ജിദ്ദ: ഓണ്‍ലൈന്‍ വിസയില്‍ സഊദിയിലേക്ക് ആഗോള വിനോദ സഞ്ചാരികള്‍ എത്തി തുടങ്ങി. ലോക ടൂറിസം ദിനത്തിനോടനുബന്ധിച്ച് രാജ്യം സന്ദര്‍ശിക്കാന്‍ ആഗ്രഹിക്കുന്നവര്‍ക്കെല്ലാം വിസ അനുവദിക്കുന്നതിനുള്ള നടപടികളും ആരംഭിച്ചിട്ടുണ്ട്. 2030ഓടെ രാജ്യത്തേക്ക് 100 മില്ല്യണ്‍ ടൂറിസ്റ്റുകളെ ആകര്‍ഷിക്കുകയും ഒരു മില്ല്യണ്‍ തൊഴിലവസരങ്ങള്‍ സൃഷ്ടിക്കുകയുമാണ് ലക്ഷ്യം.

49 രാജ്യങ്ങളിലെ പൗരന്മാര്‍ക്കാണ് ഓണ്‍ലൈന്‍ വിസ ലഭിക്കുക. visa.visstiaudi.com എന്ന പോര്‍ട്ടല്‍ വഴി വിസക്കുള്ള അപേക്ഷ പൂരിപ്പിച്ച് പണമടച്ചാല്‍ ഇമെയിലില്‍ ഓണ്‍ലൈന്‍ വിസ ലഭ്യമാകും. 30 ദിവസം താമസിക്കാവുന്നതാണ് സിംഗിള്‍ എന്‍ട്രി. എന്നാല്‍ സഊദിയില്‍ പ്രവേശിക്കാന്‍ 12 മാസം കാലാവധിയുള്ള മള്‍ട്ടിപ്പിള്‍ വിസയില്‍ ഒരു സന്ദര്‍ശനത്തില്‍ 90 ദിവസം തുടര്‍ച്ചയായി തങ്ങാനാവും. അതേ വിസയില്‍ ഒരിക്കല്‍ കൂടി വരാമെങ്കിലും 90 ദിവസത്തിലധികം താമസിക്കാന്‍ കഴിയില്ലെന്ന് ജവാസാത്ത് വൃത്തങ്ങള്‍ വെളിപ്പെടുത്തി.

ടൂറിസ്റ്റ് വിസയിലെത്തുന്ന വിശ്വാസികള്‍ക്ക് ഉംറ ചെയ്യുന്നതിനും മദീന സന്ദര്‍ശനത്തിനും അനുമതിയുണ്ടായിരിക്കും. വനിതകള്‍ക്ക് ഹജ്ജ് സീസണിലൊഴികെ ബന്ധുക്കളായ പുരുഷന്‍മാരില്ലാതെയും രാജ്യത്തേക്ക് പ്രവേശിക്കുന്നതിനും പുതിയ വിസ അനുവദിക്കുന്നുണ്ട്.