വാഷിങ്ടണ്‍: ഇറാനില്‍നിന്നുള്ള എണ്ണ ഇറക്കുമതിക്കുള്ള ഉപരോധങ്ങളിലേതിനു പുറമേ ചാബഹാര്‍ തുറമുഖത്തിലും ഇന്ത്യയ്ക്കു യു.എസിന്റെ ഇളവ്. ഉപരോധത്തില്‍പ്പെടാത്ത ഉല്‍പന്നങ്ങള്‍ തുറമുഖത്തിലുടെ അഫ്ഗാനിസ്ഥാനിലേക്കു കൊണ്ടുപോകുന്നതില്‍ തടസമുണ്ടാകില്ലെന്നു യു.എസ് പ്രതിരോധ വകുപ്പ് അറിയിച്ചു.
അഫ്ഗാനിസ്ഥാന്റെ പുനര്‍നിര്‍മാണത്തില്‍ ഇന്ത്യ വഹിക്കുന്ന പങ്ക് പരിഗണിച്ചാണ് ഇളവെന്നാണ് വിലയിരുത്തല്‍. ഇന്ത്യയും ഇറാനും അഫ്ഗാനിസ്ഥാനും ഉള്‍പ്പെടുന്നതാണ് ചാബഹാര്‍ തുറമുഖ പദ്ധതി. പാകിസ്താനിലൂടെയുള്ള സഞ്ചാരമാര്‍ഗത്തിനുള്ള തടസങ്ങള്‍ കണക്കിലെടുക്കുമ്പോള്‍ അഫ്ഗാനിസ്ഥാനുമായും മധ്യേഷ്യന്‍ രാജ്യങ്ങളുമായുമുള്ള വാണിജ്യ ഇടപാടുകള്‍ക്കു ചാബഹാര്‍ ഇന്ത്യയ്ക്കു സുപ്രധാനമാണ്.
പാകിസ്താനിലെ ഗ്വാദാര്‍ തുറമുഖത്തിന് 80 കിലോമീറ്റര്‍ മാത്രം അകലെയാണ് ചാബഹാര്‍. ചൈന-പാകിസ്താന്‍ സാമ്പത്തിക ഇടനാഴിയുടെ പശ്ചാത്തലത്തിലും ചാബഹാര്‍ ഇന്ത്യയ്ക്കു പ്രധാനമാണ്. ചാബഹാര്‍ പദ്ധതിയുടെ ഒന്നാംഘട്ടമായ ഷഹീദ് ബെഹസ്തി തുറമുഖത്തിന്റെ നടത്തിപ്പ് ചുമതല ഇന്ത്യാ പോര്‍ട്‌സ് ഗ്ലോബല്‍ ലിമിറ്റഡിന് കൈമാറാനുള്ള കരാര്‍ അടുത്തിടെ ഒപ്പുവച്ചിരുന്നു. ചാബഹാറിന്റെ പ്രവൃത്തി പൂര്‍ത്തിയായിട്ടില്ലെങ്കിലും തുറമുഖം പ്രവര്‍ത്തിച്ചുതുടങ്ങിയിട്ടുണ്ട്. ഇന്ത്യയില്‍നിന്നു ധാന്യങ്ങളും ഭക്ഷ്യവസ്തുക്കളും അഫ്ഗാനിസ്ഥാനിലേക്ക് ഈ മാര്‍ഗത്തിലൂടെ എത്തിക്കുന്നുണ്ട്.
സഹേദാനിലേക്കുള്ള റെയില്‍പാതയുടെ നിര്‍മാണം പൂര്‍ത്തിയാകുന്നതോടെ അഫ്ഗാനിസ്ഥാനിലേക്കു കൂടുതല്‍ വസ്തുക്കളെത്തിക്കാന്‍ കഴിയുമെന്ന് ഇന്ത്യയുടെ വിദേശകാര്യ സെക്രട്ടറി വിജയ് ഗോഖലെ മാധ്യമങ്ങളോട് പറഞ്ഞു. ചാബഹാര്‍ തുറമുഖത്തുനിന്നു 100 കിലോമീറ്റര്‍ അകലെയാണ് പാകിസ്താനില്‍ ചൈനയുടെ നിയന്ത്രണത്തിലുള്ള ഗ്വാദാര്‍ തുറമുഖം.