ഏറ്റുമാനൂര്‍: ഐ.സി.എസ്.ഇ സ്‌കൂളുകളുടെ അസോസിയേഷനായ എ.എസ്.ഐ.എസ്.സി കേരള മേഖല സംഘടിപ്പിച്ച 'രംഗോത്സവ് 2019' സംസ്ഥാന സ്‌കൂള്‍ കലോത്സവത്തില്‍ ഐ.സി.എസ്.ഇ വിഭാഗത്തിലും ഐ.എസ്.സി വിഭാഗത്തിലും തൃശ്ശൂര്‍ ഹരിശ്രീ വിദ്യാനിധി സ്‌കൂളിന് ഓവറോള്‍ കിരീടം. തൃശ്ശൂര്‍ സാന്ദീപനി വിദ്യാനികേതനാണു രണ്ടാംസ്ഥാനം.
കഴിഞ്ഞ അധ്യയന വര്‍ഷത്തില്‍ ഐ.എസ്.സി ബോര്‍ഡ് പരീക്ഷയില്‍ സംസ്ഥാനതലത്തില്‍ ഒന്നാം റാങ്കും ദേശീയതലത്തില്‍ രണ്ടാം റാങ്കും നേടിയ ഫിയോണ എഡ്‌വിന്‍ (ലെകോള്‍ സ്‌കൂള്‍, ചമ്പക, തിരുവനന്തപുരം), സംസ്ഥാനതലത്തില്‍ രണ്ടാം റാങ്കും ദേശീയതലത്തില്‍ മൂന്നാം റാങ്കും നേടിയ അങ്കിത രാധാകൃഷ്ണന്‍ (ക്രൈസ്റ്റ് നഗര്‍ ഹയര്‍ സെക്കണ്ടറി സ്‌കൂള്‍, തിരുവനന്തപുരം) എന്നിവര്‍ക്കും സമ്മാനം നല്‍കി.
ഐ.സി.എസ്.ഇ പരീക്ഷയില്‍ സംസ്ഥാനതലത്തില്‍ ഒന്നാം റാങ്ക് നേടിയ നിമിത ജോസ് ഇടശ്ശേരി (സെന്റ് പാട്രിക്‌സ് അക്കാദമി, അങ്കമാലി)യെയും മറ്റ് ഉന്നത റാങ്ക് ജേതാക്കളെയും അനുമോദിച്ചു.
എ.എസ്.ഐ.എസ്.സി മേഖലാ പ്രസിഡന്റ് ഫാ. ജെയിംസ് മുല്ലശ്ശേരിയുടെ അധ്യക്ഷതയില്‍ നടന്ന സമാപന സമ്മേളനത്തില്‍ സിനിമാ നടന്‍ പ്രേംപ്രകാശ് സമ്മാനദാനം നിര്‍വഹിച്ചു. കവയിത്രി എളംകുളം ഷീല രാജന്‍ മുഖ്യാതിഥിയായിരുന്നു.
ഫാ. ജോര്‍ജ്ജ് മാത്യു കാരൂര്‍, പി.വി മൈക്കിള്‍, അതിരമ്പുഴ ഗ്രാമപഞ്ചായത്ത് പ്രസിഡന്റ് ലിസി ടോമി, റെജി മാത്യു, സൗമ്യ വാസുദേവന്‍, ഫാ.ചാള്‍സ് മുണ്ടകത്തില്‍, ഷാജി ജോര്‍ജ്ജ്, കെ.ഇ. സ്‌കൂള്‍ പി.ടി.എ. പ്രസിഡന്റ് ജോമി മാത്യു, വൈസ് പ്രസിഡന്റ് സന്ധ്യാ ജി. കുറുപ്പ്, ബിന്‍സി സന്തോഷ് എന്നിവര്‍ പ്രസംഗിച്ചു.