കൂത്തുപറമ്പ്:  യാത്രികരെ അപകടങ്ങളില്‍  നിന്നും രക്ഷിക്കാന്‍ റോഡിന്റ മധ്യത്തില്‍ സ്ഥാപിച്ച ഡിവൈഡറുകള്‍  മരണക്കെണിയൊരുക്കുന്നു. മാനന്തേരി പതിനാലാം മൈലിലെ ഡിവൈഡറുകളാണ്  യാത്രക്കാരുടെ ജീവനു ഭീഷണിയാകുന്നത്.
 യാതൊരു സൂചകബോര്‍ഡുകളും ഇവിടെ സ്ഥാപിച്ചിട്ടില്ല.  യഥാസമയം അറ്റകുറ്റ പ്രവൃത്തി നടത്തി പെയിന്റടിക്കാത്തതിനാല്‍ കാടുകയറിയ അവസ്ഥയിലാണ്.
 വാഹനമോടിക്കുന്നവര്‍ ഇതുകാണാത്തതാണ് അപകടത്തില്‍പ്പെടാന്‍ കാരണമെന്ന് നാട്ടുകാര്‍ പറയുന്നു.കഴിഞ്ഞ ദിവസം മംഗളുരുവില്‍ നിന്നും വയനാട്ടിലേക്ക് ഗ്യാസ് സിലിണ്ടറുകളുമായി പോവുകയായിരുന്ന ലോറി ഈ ഡിവൈഡറില്‍ കയറി മറിഞ്ഞിരുന്നു. നിരവധി ബൈക്ക് യാത്രികര്‍ക്കും ജീവന്‍ നഷ്ടപ്പെട്ടു. തൊക്കിലങ്ങാടി മുതല്‍ പൂക്കോട് വരെയുള്ള ഭാഗത്തെ ഡിവൈഡറുകളുടെ അവസ്ഥയും ഇതു തന്നെയാണ്. വേണ്ടത്ര ഉയരമില്ലാതെ നിര്‍മ്മിക്കപ്പെട്ട ഡിവൈഡറുകള്‍ അടുത്തെത്തിയാല്‍ മാത്രമേ ഡ്രൈവര്‍മാരുടെ ശ്രദ്ധയില്‍ പെടുകയുള്ളൂ.