കരുനാഗപ്പള്ളി: ആരോഗ്യമേഖലയില്‍ പുതിയ കാഴ്ചപ്പാട് വളര്‍ത്തിയെടുക്കാനാണ് സര്‍ക്കാര്‍ ശ്രമിക്കുന്നതെന്ന് സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു. ക്യാപ്റ്റന്‍ ലക്ഷ്മി ഹെല്‍ത്ത് ആന്റ് പാലിയേറ്റിവ് സൊസൈറ്റി നിര്‍മിച്ചു നല്‍കിയ വീടിന്റെ താക്കോല്‍ദാനം നിര്‍വഹിച്ചു സംസാരിക്കുകയായിരുന്നു അദ്ദേഹം. പുതിയ കാഴ്ചപ്പാടിന്റെ ഭാഗമാണ് ആര്‍ദ്രം പദ്ധതി. കുടുംബ ഡോക്ടര്‍ എന്ന സംവിധാനം കൊണ്ടുവരാനാണ് സര്‍ക്കാര്‍ ശ്രമം. ക്യൂബയാണ് ഈ രംഗത്ത് ശ്രദ്ദേയമായ മാതൃക സൃഷ്ടിച്ചിട്ടുള്ളതെന്നും അദ്ദേഹം പറഞ്ഞു.
പരിസര ശുചീകരണത്തിന് സമൂഹം ഒറ്റക്കെട്ടായി രംഗത്തിറങ്ങണം. പാലിയേറ്റിവ് സംഘടനകളും ഗ്രന്ഥശാലകളും തദ്ദേശസ്ഥാപനങ്ങളും ഇതിന് നേതൃത്വം നല്‍കണമെന്നും അദ്ദേഹം പറഞ്ഞു. അര്‍ബുദ രോഗം ബാധിച്ച് അകാലത്തില്‍ മരണപ്പെട്ട മരുതൂര്‍ക്കുളങ്ങര തെക്ക് രതീഷ് ഭവനത്തില്‍ രതീഷിന്റെ മാതാപിതാക്കള്‍ക്കാണ് വീട് വച്ചു നല്‍കിയത്. നിര്‍മാണ കമ്മിറ്റി ചെയര്‍മാന്‍ കെ.എസ് ഷറഫുദ്ദീന്‍ മുസ്‌ലിയാര്‍ അദ്ധ്യക്ഷനായി. സൊസൈറ്റി സെക്രട്ടറി കോട്ടയില്‍ രാജു സ്വാഗതം പറഞ്ഞു. പ്രസിഡന്റ് കെ ജി ശിവപ്രസാദ് റിപ്പോര്‍ട്ട് അവതരിപ്പിച്ചു. സി.പി.ഐ.എം ജില്ലാ സെക്രട്ടറി കെ.എന്‍ ബാലഗോപാല്‍, ആര്‍ രാമചന്ദ്രന്‍ എം.എല്‍.എ സംസ്ഥാന കമ്മിറ്റി അംഗം സൂസന്‍ കോടി, ഏരിയാ സെക്രട്ടറി പി കെ ബാലചന്ദ്രന്‍ ,ഡോ.എ നാസര്‍ എന്നിവര്‍ സംസാരിച്ചു.