കൊട്ടാരക്കര: കൊട്ടാരക്കരയിലെ ഓട്ടോറിക്ഷകളില്‍ ഇനി മുതല്‍ വായനയുടെ സുഖം അറിഞ്ഞ് യാത്ര ചെയ്യാം . യാത്രക്കാര്‍ക്ക് വായിക്കാന്‍ പുസ്തകങ്ങളുമായാണ് ടൗണിലെ പത്ത് ഓട്ടോറിക്ഷകള്‍ സവാരി നടത്തുന്നത്. വായനാദിനത്തില്‍ തുടങ്ങിയ പദ്ധതി ഗ്രന്ഥശാലാ സംഘം താലൂക്ക്‌സെക്രട്ടറി പി.കെ ജോണ്‍സണ്‍ ഉദ്ഘാടനം ചെയ്തു. 

പെരുകുളം ബാപ്പുജി വായനശാലയിലെ എം. മുകുന്ദന്‍ ആരാധകക്കൂട്ടത്തിന്റെ നേതൃത്വത്തിലാണ് പുതിയ പദ്ധതി തുടക്കം കുറിച്ചത്. തുടക്കത്തില്‍ പത്ത് ഓട്ടോറിക്ഷകളിലാണ് പുസ്തകം വായിക്കാനുള്ള സൗകര്യമൊരുക്കുന്നത്. പിന്നീട് പദ്ധതി വിപുലീകരിക്കും.
വായനശാലാ പ്രസിഡന്റ് പെരുംകുളം രാജീവ്, വായനശാലാ അഭിരാമി എസ്.ആര്‍, ഡോ.കെ.വത്‌സലാമ്മ, എസ്.ആര്‍ രമേശ്, കെ.ഗോപാലന്‍, അനസ് എന്നിവര്‍ ചടങ്ങില്‍ സംബന്ധിച്ചു.