അബൂദബി: അബൂദബിയിലെ എന്‍.ബി.എ ഫാന്‍ അപ്പ്രീസിയേഷന്‍ ഡേയില്‍ ബാസ്‌കറ്റ്‌ബോള്‍ കോര്‍ട്ടില്‍ ഫുട്‌ബോള്‍ ഇതിഹാസങ്ങളുടെ ഏറ്റുമുട്ടല്‍. അവിസ്മരണീയമായ കാഴ്ചയായിരിക്കുമിതെന്ന് സംഘാടകര്‍ അവകാശപ്പെടുന്നു.

ഒക്ടോബര്‍ 5ന് യാസ് ഐലന്‍ഡിലെ ഇത്തിഹാദ് അരീനയില്‍ 'ക്ലാഷ് ഓഫ് ദി ലെജന്‍ഡ്‌സ്' എന്ന പേരില്‍ ഹൈബ്രിഡ് ബാസ്‌കറ്റ്‌ബോള്‍, ഫുട്‌ബോള്‍ മത്സരം ഡിപ്പാര്‍ട്ട്‌മെന്റ് ഓഫ് കള്‍ച്ചര്‍ ആന്‍ഡ് ടൂറിസം അബൂദബി (ഡി.സി.ടി അബൂദബി) ആണ് അവതരിപ്പിക്കുന്നത്.

എക്കാലത്തെയും മികച്ച ഫുട്‌ബോള്‍ താരങ്ങളില്‍ ചിലരാണ് ആവേശം നിറയ്ക്കുന്ന 3x3 ഗെയിമില്‍ അണിനിരക്കുക.

ചരിത്രത്തിലാദ്യമായാണ് ഇത്തരമൊരു അപൂര്‍വ മത്സരം. ബ്രസീലിയന്‍ സെന്‍സേഷന്‍ റോബര്‍ട്ടോ കാര്‍ലോസ്, പോര്‍ച്ചുഗീസ് ഇതിഹാസം ലൂയിസ് ഫിഗോ, സ്‌പെയിനിന്റെ സ്റ്റാര്‍ ഗോള്‍ കീപ്പര്‍ ഇകര്‍ കസിയസ് എന്നിവര്‍ തങ്ങളുടെ മികച്ച ബാസ്‌കറ്റ്‌ബോള്‍, ഫുട്‌ബോള്‍ നീക്കങ്ങള്‍ കോര്‍ട്ടിലേക്ക് കൊണ്ടുവരും. ഫുട്‌ബോള്‍ പ്രതിഭാസമായി റൊണാള്‍ഡീഞ്ഞോ, മാസ്റ്റര്‍ ഫുള്‍ സ്‌ട്രൈക്കര്‍ തിയറി ഹെന്റി, സ്‌പെയിനിന്റെ വിഖ്യാത സെന്റര്‍ ബാക്ക് ജെറാര്‍ഡ് പിക്വെ എന്നിവരെയാണ് അവര്‍ നേരിടുന്നത്. ഇത്തിഹാദ് അരീനയിലെ ബാസ്‌കറ്റ്‌ബോള്‍ കോര്‍ട്ടില്‍ ഈ ആറ് ഫുട്‌ബോള്‍ ഇതിഹാസങ്ങള്‍ തീ പറത്തും.

''റൊണാള്‍ഡീഞ്ഞോ, തിയറി, ജെറാര്‍ഡ് എന്നിവര്‍ക്കെതിരെ വീണ്ടും മത്സരിക്കാന്‍ ഞാന്‍ കാത്തിരിക്കുകയാണ്. അന്ന് ഞങ്ങള്‍ കളിച്ച തീവ്രമായ ഫുട്‌ബോള്‍ മത്സരങ്ങള്‍ ആരാധകര്‍ ഓര്‍ക്കുന്നു. ആ മത്സരം ബാസ്‌കറ്റ്‌ബോള്‍ കോര്‍ട്ടിലേക്ക് കൊണ്ടുവരുന്നത് എല്ലാവര്‍ക്കും വളരെ വിശേഷപ്പെട്ടതാകും'' കസിയസ് പറഞ്ഞു.

റോബര്‍ട്ടോ ഞങ്ങളുടെ ഇലക്ട്രിക് പോയിന്റ് ഗാര്‍ഡായിരിക്കും. പ്രധാന നിമിഷങ്ങളില്‍ ലൂയിസ് തിളങ്ങും കസിയസ് പ്രതീക്ഷ പ്രകടിപ്പിച്ചു.

ഇത് ചരിത്രപരമായിരിക്കുമെന്ന് ഞാന്‍ കരുതുന്നു. കാരണം, ആദ്യമായി ഞങ്ങള്‍ പരസ്പരം ബാസ്‌ക്കറ്റ്‌ബോള്‍ കളിക്കും പിക്വെ അഭിപ്രായപ്പെട്ടു.

തങ്ങള്‍ക്ക് പിച്ചില്‍ നിരവധി ഇതിഹാസ ഗെയിമുകള്‍ ഉണ്ടായിരുന്നുവെന്നും, ഒരു ബാസ്‌ക്കറ്റ്‌ബോള്‍ കോര്‍ട്ടിലെ ആ മത്സരം പുനരുജ്ജീവിപ്പിക്കുന്നത് വളരെയധികം ആവേശവും മത്സരവും നല്‍കുമെന്നും, റൊണാള്‍ഡീഞ്ഞോയും തിയറിയും ടീമിലുള്ളതിനാല്‍ മാജിക് കാണാമെന്നും പിക്വെ പ്രത്യാശിച്ചു.

Football legends clash at Yas Island Etihad Arena on October 5