തിരുവനന്തപുരം: സ്‌കൂളിലെ പ്രവര്‍ത്തിസമയങ്ങള്‍ തടസ്സപ്പെടുത്തുന്ന രീതിയിലുള്ള മീറ്റിങ്ങുകള്‍ നിരോധിച്ച് സര്‍ക്കാര്‍ ഉത്തരവിറക്കി. ക്ലാസ് നടന്നുകൊണ്ടിരിക്കുന്ന സമയങ്ങളില്‍ പിടിഎ, സ്റ്റാഫ്, എസ്.എം.സി മീറ്റിങ്ങുകള്‍ നടത്താന്‍ പാടില്ലെന്നാണ് ഉത്തരവ്. 

മാത്രമല്ല, സ്‌കൂളുകളില്‍ നിന്ന് വിരമിക്കുന്ന ജീവനക്കാര്‍ക്കുള്ള യാത്രയയപ്പ് യോഗങ്ങളും അനുബന്ധ പരിപാടികളും സ്‌കൂളിന്റെ പ്രവര്‍ത്തന സമയങ്ങളില്‍ നടത്താന്‍ പാടില്ല. പകരം ഇവ പ്രവൃത്തി സമയത്തിന് മുന്‍പോ അതിന് ശേഷമോ നടത്തണമെന്നാണ് നിര്‍ദേശം. ഇനി ഏതെങ്കിലും രീതിയില്‍ അടിയന്തര മീറ്റിങ്ങുകള്‍ നടത്തേണ്ടി വന്നാല്‍ വിദ്യാഭ്യാസ ഓഫീസറുടെ അനുമതി തേടണമെന്നും ഉത്തരവിലുണ്ട്. നിര്‍ദേശം കൃത്യമായി പാലിക്കുന്നുണ്ടെന്ന് ഉറപ്പാക്കേണ്ടത് അതത് വിദ്യാഭ്യാസ ഓഫീസര്‍മാരാണ്. മീറ്റിങ്ങുകള്‍ മൂലം പഠനസമയം നഷ്ടപ്പെടുന്നുണ്ടെന്ന പരാതിയെ തുടര്‍ന്നാണ് സര്‍ക്കാര്‍ തീരുമാനം.

Govt issued an order  to staff pta smc Meetings prohibited during school hours