റിയാദ്: യമനില്‍ ഔദ്യോഗിക സര്‍ക്കാനെതിരെയും അയല്‍ രാജ്യമായ സഊദിക്കെതിരെയും നിരന്തരം ഭീഷണിയുയര്‍ത്തുന്ന ഇറാന്‍ പിന്തുണയുള്ള ഹൂതികളെ തീവ്രവാദ, ഭീകരവാദ പട്ടികയില്‍ ഉള്‍പ്പെടുത്താന്‍ അമേരിക്ക നീക്കമാരംഭിച്ചു. അമേരിക്കന്‍ അധികൃതരെ ഉദ്ധരിച്ച് വാഷിംഗ് ടണ്‍ പോസ്റ്റാണ് ഇക്കാര്യം റിപ്പോര്‍ട്ട് ചെയ്തത്. ഹൂതികള്‍ക്കെതിരെയുള്ള നടപടികളുടെ ഭാഗമായി വൈറ്റ് ഹൗസില്‍ വെച്ച് ചര്‍ച്ചകള്‍ നടന്നതായും എന്നാല്‍ ഇക്കാര്യത്തില്‍ അന്തിമ തീരുമാനനമെടുത്തിട്ടില്ലെന്നും ഉറവിടം വ്യക്തമാകാത്ത റിപ്പോര്‍ട്ടുകള്‍ ഉദ്ധരിച്ചു പോസ്റ്റില്‍ പറയുന്നു.

2016 മുതല്‍ നിരവധി തവണ ഹൂതികളുമായുള്ള പ്രശ്‌നത്തില്‍ ചര്‍ച്ചകള്‍ നടന്നിരുന്നു. ഇറാനുമായുള്ള ഉപരോധം നടപ്പിലാക്കുന്നതിന് മുന്‍പേ തന്നെ ഇറാനുമായി ചേര്‍ന്ന് പ്രവര്‍ത്തിക്കുന്ന സംഘടനകളെ ലിസ്റ്റില്‍ ഉള്‍പ്പെടുത്താനുമുള്ള ശ്രമങ്ങള്‍ ആരംഭിച്ചരുന്നു. ഇതിന്റെ തുടര്‍ച്ചയായാണ് ഹൂതികളെ തീവ്രവാദ പട്ടികയില്‍ ഉള്‍പ്പെടുത്താന്‍ നീക്കമാരംഭിച്ചത്. ഇതിനിടയില്‍, സംഘര്‍ഷം രൂക്ഷമായ ഹുദൈദയിലെ ആശുപത്രികള്‍ സൈനിക കേന്ദ്രങ്ങളാക്കി മാറ്റുന്നതിരെയും സിവിലിയന്മാരെ സംരക്ഷിക്കണമെന്നാവശ്യപ്പെട്ട് കഴിഞ്ഞ ദിവസം അന്താരാഷ്ട്ര മനുഷ്യാവകാശ സംഘടനാ രംഗത്തെത്തിയിരുന്നു.
അമേരിക്ക ഹൂതികളെ പട്ടികയില്‍ ഉള്‍പ്പെടുത്തിയാല്‍ നേതാക്കള്‍ക്ക് യാത്രാ വിലക്കുകകള്‍ ഉണ്ടാകുകയും വിവിധ ഭാഗങ്ങളില്‍ നിന്നുള്ള സാമ്പത്തിക സഹായം ലഭിക്കുന്നത് തടയാനാകുകയും ചെയ്യും. ഇവര്‍ക്ക് സഹായകരമായി പ്രവര്‍ത്തിക്കുന്നവര്‍ക്കെതിരെ നടപടിയെടുക്കാനും അമേരിക്കക്ക് കഴിയുമെന്ന് റിപ്പോര്‍ട്ടില്‍ വ്യക്തമാക്കുന്നു.