കാട്ടാക്കട: പൂവച്ചല്‍ സര്‍ക്കാര്‍ വൊക്കേഷണല്‍ ഹയര്‍ സെക്കന്ററി സ്‌കൂളിലെ നാഷണല്‍ സര്‍വിസ് സ്‌കീം യൂനിറ്റും മറ്റു ക്ലബുകളുടെയും സംയുക്താഭിമുഖ്യത്തില്‍ സ്‌കൂള്‍ അങ്കണത്തില്‍ 'പുസ്തക തൊട്ടില്‍' കെട്ടി പുസ്തകം ശേഖരിച്ചു.
വായനദിന പ്രതിജ്ഞ, വായന ദിന ക്വിസ് തുടങ്ങിയവയുമുണ്ടായിരുന്നു. സ്‌കൂളിലെ ഓഫിസിനു മുന്നിലായി ഒരു തൊട്ടില്‍ ഒരുക്കുകയും ഓരോ വിദ്യാര്‍ഥികളും തങ്ങളുടെ വീട്ടിലുള്ളതും വായിച്ചു കഴിഞ്ഞതുമായ ഓരോ ബുക്ക് വീതം കൊണ്ട് വന്ന് സ്‌കൂളില്‍ ഒരുക്കിയ പുസ്തകതൊട്ടിലില്‍ നിക്ഷേപിക്കുക എന്നതായിരുന്നു ഈ പദ്ധതി.
വിദ്യാര്‍ഥികള്‍ ശേഖരിച്ച പുസ്തകങ്ങളില്‍ നിന്നും നൂറ്റി ഒന്ന് പുസ്തകങ്ങള്‍ വെള്ളനാട് പ്രവര്‍ത്തിക്കുന്ന കരുണാസായി സൈക്കോ പാര്‍ക്കിലെ ലൈബ്രറിയിലേയ്ക്ക് സംഭാവന ചെയ്തു.
പാര്‍ക്കിലെ വൈക്കം മുഹമ്മദ് ബഷീറിന്റെ പ്രതിമയ്ക്ക് മുന്‍പില്‍ നൂറ്റി ഒന്ന് ബുക്കുകള്‍ സമര്‍പ്പിച്ചു.
കരുണാസായി ഡയറക്ടര്‍ ഡോ.എല്‍.ആര്‍. മധുജന്‍ , സൂകള്‍ പ്രിന്‍സിപ്പാള്‍ സീമ സേവ്യര്‍, പി.ടി.എ പ്രസിഡന്റ് പൂവച്ചല്‍ സുധീര്‍, സമീര്‍ സിദ്ദീഖി.കൗണ്‍സിലര്‍ അജിത് കുമാര്‍, സോഷ്യല്‍ വര്‍ക്കര്‍ സൂര്യ.എസ്, അശ്വതി.എഫ്.എസ്, ശരണ്യ.എസ്.ആര്‍ , രഞ്ചു.എസ്, സീമ പി.എസ് സംസാരിച്ചു.