കൊല്ലം: ഭരണഘടനയേയും ജനാധിപത്യത്തേയും അട്ടിമറിച്ച് കേരളത്തില്‍ കലാപം നടത്താന്‍ ആരേയും അനുവദിക്കില്ലന്ന് മന്ത്രി ജെ. മേഴ്‌സിക്കുട്ടിയമ്മ പറഞ്ഞു. കുണ്ടറ നിയോജക മണ്ഡലത്തിന്റെ സമഗ്ര വികസനത്തിനായി നടപ്പിലാക്കുന്ന ഇടം പദ്ധതിയുടെ ആഭിമുഖ്യത്തില്‍ മുഖത്തല ബ്ലോക്ക് പഞ്ചായത്ത് ഹാളില്‍ സംഘടിപ്പിച്ച ക്ഷേത്രപ്രവേശന വിളംബരത്തിന്റെ 82-ാം വാര്‍ഷിക അനുസ്മരണ യോഗം ഉദ്ഘാടനം ചെയ്യുകയായിരുന്നു മന്ത്രി. മുഖത്തല ബ്ലോക്ക് പഞ്ചായത്ത് ഹാളില്‍ നടന്ന ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് എസ്. രാജീവ് അധ്യക്ഷത വഹിച്ചു. ഇടം പദ്ധതി നോഡല്‍ ഓഫിസര്‍ വി. സുദേശന്‍ വിഷയം അവതരിപ്പിച്ചു. തൃക്കോവില്‍വട്ടം ഗ്രാമപഞ്ചായത്ത് പ്രസിഡന്റ് സുലോചന സംസാരിച്ചു. ബ്ലോക്ക് പഞ്ചായത്ത് വൈസ് പ്രസിഡന്റ് ജയകുമാരി, ബി.ഡി.ഒ വിമല്‍ ചന്ദ്രന്‍ പങ്കെടുത്തു.