കുറ്റ്യാടി: മലയോരത്തും പരിസര പ്രദേശങ്ങളിലും കഞ്ചാവ് എത്തിച്ചുനല്‍കുന്ന സംഘത്തിലെ പ്രധാന കണ്ണി പൊലിസ് പിടിയില്‍. കാവിലുംപാറ കരിങ്ങാട് സ്വദേശി കക്കുടാരത്തില്‍ ഗോകുല്‍ദാസിനെ(22)യാണ് കുറ്റ്യാടി എസ്.ഐ ഹരീഷിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
കഞ്ചാവ് വില്‍പന നടത്തുകയും കടത്തുകയും ചെയ്യുന്നതായുള്ള രഹസ്യവിവരം റൂറല്‍ എസ്.പിക്കു ലഭിച്ചതിന്റെ അടിസ്ഥാനത്തില്‍ കുറ്റ്യാടി സി.ഐ സുനില്‍കുമാറിന്റെ നിര്‍ദേശപ്രകാരം നടത്തിയ പരിശോധനയിലാണ് കുറ്റ്യാടി ബസ് സ്റ്റാന്‍ഡ് പരിസരത്തുവച്ച് ഒരു കിലോ കഞ്ചാവുമായി ഇന്നലെ രാവിലെ പ്രതിയെ അറസ്റ്റ് ചെയ്തത്. ഗോകുല്‍ദാസിനെ നേരത്തെയും കഞ്ചാവ് കേസില്‍ അറസ്റ്റ് ചെയ്തിരുന്നു. സ്‌ക്വാഡ് അംഗങ്ങളായ കെ. പ്രദീപന്‍, സജീഷ്, ഷിജില്‍ കുമാര്‍, പ്രകാശന്‍ എന്നിവരും പൊലിസ് സംഘത്തിലുണ്ടായിരുന്നു.