വടകര: അമൃത പബ്ലിക് സ്‌കൂള്‍ ഒന്‍പതാം ക്ലാസ് വിദ്യാര്‍ഥിനി നാദാപുരം റോഡിലെ വേദ യു. രമേശ് (14) മരിച്ചത് മതിയായ ചികിത്സ ലഭ്യമാക്കാത്തതിനെ തുടര്‍ന്നെന്ന് ഡോക്ടറുടെ ആരോപണം. ഇതേതുടര്‍ന്ന് വടകര പൊലിസ് അസ്വാഭാവിക മരണത്തിന് കേസെടുത്തു.
ദിവസങ്ങളോളം പനി ബാധിച്ചിട്ടും ആശുപത്രിയില്‍ ചികിത്സ തേടാന്‍ രക്ഷിതാവ് തയാറായിരുന്നില്ലെന്നാണ് ആരോപണം. പ്രകൃതി ചികിത്സയെ പിന്തുടരുന്ന ഇയാള്‍ പച്ചവെള്ളവും തേനുമാണു മകള്‍ക്കു നല്‍കിയത്. ഒരാഴ്ചയ്ക്കുശേഷം പനി മൂര്‍ഛിച്ച് പെണ്‍കുട്ടി തല കറങ്ങി വീണപ്പോഴാണു കഴിഞ്ഞ ചൊവ്വാഴ്ച രാത്രി ആശുപത്രിയില്‍ കൊണ്ടുപോയത്. വടകര സ്വകാര്യ ആശുപത്രിയിലെ ഡോക്ടര്‍ പരിശോധിച്ചപ്പോള്‍ ന്യുമോണിയ ബാധിച്ചതായി കണ്ടെത്തി. ഉടന്‍ കോഴിക്കോട്ടെ സ്വകാര്യ ആശുപത്രിയിലേക്ക് റഫര്‍ ചെയ്തു. തുടര്‍ന്ന് ഇവിടെയെത്തിച്ചപ്പോഴേക്കും കുട്ടിയുടെ സ്ഥിതി ഗുരുതരമായിരുന്നു. ബുധനാഴ്ച പുലര്‍ച്ചെ ആശുപത്രിയില്‍ വച്ചാണു കുട്ടി മരണത്തിനു കീഴടങ്ങിയത്.
മാതാപിതാക്കളുടെ അലംഭാവമാണ് കുട്ടിയുടെ മരണത്തിനിടയാക്കിയതെന്ന് ആരോപിച്ച് ഡോക്ടര്‍ മൃതദേഹം വിട്ടുനല്‍കാന്‍ തയാറായില്ല. പൊലിസിനെ വിവരം അറിയിക്കുകയും ചെയ്തു. ഇതേതുടര്‍ന്ന് വടകര പൊലിസ് അസ്വാഭാവിക മരണത്തിന് കേസെടുക്കുകയായിരുന്നു. ഇന്‍ക്വസ്റ്റ് ചെയ്ത മൃതദേഹം മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തിയ ശേഷമാണു ബന്ധുക്കള്‍ക്കു വിട്ടുകൊടുത്തത്.
ആധുനിക ചികിത്സ യഥാസമയം ലഭ്യമാക്കിയിരുന്നെങ്കില്‍ പെണ്‍കുട്ടിയുടെ ജീവന്‍ നഷ്ടപ്പെടുമായിരുന്നില്ലെന്ന് ഡോക്ടര്‍ വെളിപ്പെടുത്തി. അതേസമയം, പോസ്റ്റ്‌മോര്‍ട്ടം റിപ്പോര്‍ട്ട് കിട്ടിയ ശേഷം മാത്രമേ തുടര്‍നടപടിയെ കുറിച്ച് ആലോചിക്കുകയുള്ളൂവെന്ന് പൊലിസ് അറിയിച്ചു. അച്ഛന്‍ സ്വകാര്യ മേഖലയില്‍ ജോലി ചെയ്യുന്ന സിവില്‍ എന്‍ജിനീയറും അമ്മ വടകരയില്‍ വനിതാ പൊലിസ് ജീവനക്കാരിയുമാണ്. ഇവര്‍ക്ക് ഒരു മകള്‍ കൂടിയുണ്ട്.