തിരുവനന്തപുരം: അംഗങ്ങളുടെ ഒഴിവ് വന്നിട്ടുള്ള തദ്ദേശഭരണ വാര്‍ഡുകളില്‍ ഉപതെരഞ്ഞെടുപ്പിനുള്ള കരട് വോട്ടര്‍പട്ടിക പ്രസിദ്ധീകരിച്ചു. തിരുവനന്തപുരം അതിയന്നൂര്‍ ഗ്രാമപഞ്ചായത്തിലെ മരുതംകോട് വാര്‍ഡ്, മടവൂര്‍ ഗ്രാമപഞ്ചായത്തിലെ സീമന്തപുരം, പടിഞ്ഞാറേമൂല വാര്‍ഡുകള്‍, കൊല്ലം കോര്‍പറേഷനിലെ കയ്യാലയ്ക്കല്‍ വാര്‍ഡ്, ഇടുക്കി മാങ്കുളം ഗ്രാമപഞ്ചായത്തിലെ അമ്പതാംമൈല്‍, തൃശൂര്‍ വടക്കേക്കാട് ഗ്രാമപഞ്ചാത്തിലെ ഞമനേങ്ങാട് വാര്‍ഡ്, ദേശമംഗലം ഗ്രാമപഞ്ചായത്തിലെ പല്ലൂര്‍ ഈസ്റ്റ് വാര്‍ഡ്, പാലക്കാട് മുനിസിപ്പാലിറ്റിയിലെ മേപ്പറമ്പ് വാര്‍ഡ് എന്നിവിടങ്ങളിലാണ് ഉപതെരഞ്ഞെടുപ്പ് നടത്തുന്നത്. കരട്പട്ടിക അതാത് സ്ഥാപനങ്ങളിലും ബ്ലോക്ക് ഓഫിസിലും താലൂക്ക് ഓഫിസിലും പ്രസിദ്ധീകരിച്ചിട്ടുണ്ട്.

കമ്മിഷന്റെ www.lsgelection.kerala.gov.in വെബ്‌സൈറ്റിലും ലഭ്യമാണ്. കരട്പട്ടിക സംബന്ധിച്ച അപേക്ഷകളും ആക്ഷേപങ്ങളും ആഗസ്റ്റ് 20 വൈകുന്നേരം അഞ്ച് മണിവരെ സ്വീകരിക്കും. പേര് ഉള്‍പ്പെടുത്തുന്നതിനും തിരുത്തലുകള്‍ വരുത്തുന്നതിനും സ്ഥാനമാറ്റം നടത്തുന്നതിനുമുള്ള അപേക്ഷകള്‍ ഓണ്‍ലൈനിലൂടെ വേണം സമര്‍പ്പിക്കേണ്ടത്. പേര് ഉള്‍പ്പെടുത്തിയത് സംബന്ധിച്ച ആക്ഷേപങ്ങള്‍ നേരിട്ടോ രജിസ്റ്റേഡ് തപാലിലോ സമര്‍പ്പിക്കണം. അപേക്ഷകള്‍ തീര്‍പ്പുകല്‍പിച്ച് ഈ മാസം 31 ന് അന്തിമ വോട്ടര്‍പട്ടിക പ്രസിദ്ധീകരിക്കും.