ചേളാരി: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ഈവര്‍ഷം മുതല്‍ പരിഷ്‌കരിച്ച പാഠപുസ്തകങ്ങളെകുറിച്ച് രക്ഷിതാക്കള്‍ക്ക് ഓറിയന്റേഷന്‍ ക്ലാസുകള്‍ സംഘടിപ്പിക്കുന്നു. പരിഷ്‌കരിച്ച പാഠപുസ്തകങ്ങളെ പരിചയപ്പെടുത്തല്‍, പാഠ്യപദ്ധതി സമീപനം, പഠന നിലവാരം മെച്ചപ്പെടുത്തല്‍, മദ്‌റസ ശാക്തീകരണ പദ്ധതികള്‍, അധ്യാപക രക്ഷാകര്‍തൃ ബന്ധം, ശിശു സൗഹൃദ പഠനം എന്നിവയെകുറിച്ച് രക്ഷിതാക്കളില്‍ അവബോധമുണ്ടാക്കുന്നതിനാണ് ഓറിയന്റേഷന്‍ ക്ലാസുകള്‍ നടത്തുന്നത്.

സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് നിയോഗിച്ച ഇന്‍സ്‌പെക്ടര്‍മാര്‍ ക്ലാസുകള്‍ക്ക് നേതൃത്വം നല്‍കും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ അംഗീകാരത്തോടെ പ്രവര്‍ത്തിക്കുന്ന 9626 മദ്‌റസകളിലെ എണ്‍പതിനായിരത്തില്‍പരം വരുന്ന അധ്യാപകര്‍ക്കുള്ള റെയ്ഞ്ച്തല ശില്‍പശാല ഇതിനകം പൂര്‍ത്തിയായിട്ടുണ്ട്. ഓറിയന്റേഷന്‍ ക്ലാസുകളുടെ സംസ്ഥാനതല ഉദ്ഘാടനം 12ന് വൈകീട്ട് ഏഴിന് വെളിമുക്ക് ആലുങ്ങല്‍ റൗളത്തുല്‍ ജന്ന മദ്‌റസയില്‍ നടക്കും.