കൊല്‍ക്കത്ത: ഇന്ത്യയും ബംഗ്ലാദേശും തമ്മിലുള്ള ലോകകപ്പ് ഫുട്‌ബോള്‍ യോഗ്യതാ മത്സരം ഇന്ന് നടക്കും. വൈകിട്ട് 7.30ന് കൊല്‍ക്കത്ത സാള്‍ട്ട്‌ലേക്ക് സ്റ്റേഡിയത്തിലാണ് മത്സരം. ഒരു സമനിലയും ഒരു തോല്‍വിയുമുള്ള ഇന്ത്യക്ക് ഇന്ന് ജയം അനിവാര്യമാണ്. ഗ്രൂപ്പ് ഇയിലെ രണ്ടാം റൗണ്ട് മത്സരത്തിലാണ് ഇന്ത്യ ബംഗ്ലാദേശിനെ നേരിടുന്നത്.
അഞ്ച് ടീമുകളുള്ള പട്ടികയില്‍ ഇന്ത്യ ഇപ്പോള്‍ നാലാം സ്ഥാനത്താണുള്ളത്. ഏഴു പോയിന്റുമായി ഖത്തര്‍ ഒന്നാം സ്ഥാനത്ത് നില്‍ക്കുന്നു. ഖത്തറിന് രണ്ട് വിജയവും ഒരു സമനിലയുമാണുള്ളത്. കളിച്ച രണ്ടിലും വിജയിച്ച ഒമാന്‍ ആറ് പോയിന്റുമായി രണ്ടാം സ്ഥാനത്തും ഒരു ജയവും രണ്ട് തോല്‍വിയുമുള്ള അഫ്ഗാനിസ്ഥാന്‍ 3 പോയിന്റുമായി മൂന്നാം സ്ഥാനത്തുമുണ്ട്. ഇന്നത്തെ മത്സരത്തില്‍ ഇന്ത്യക്ക് ജയിക്കാനായാല്‍ ഇന്ത്യയുടെ പ്രതീക്ഷ നിലനില്‍ക്കും.
ബംഗ്ലാദേശ് അവസാനമായി ഖത്തറിനെതിരേ എതിരില്ലാത്ത രണ്ട് ഗോളിന് പരാജയപ്പെട്ടിരുന്നു. ഇന്ത്യ അവസാന മത്സരത്തില്‍ ഖത്തറിനെ ഗോള്‍ രഹിത സമനിലയില്‍ തളക്കുകയും ചെയ്തിട്ടുണ്ട്. ബംഗ്ലാദേശിനെ ചെറുതായി കാണുന്നില്ലെന്നും ഏറ്റവും ശക്തമായ മത്സരം തന്നെ ഇന്ന് കാണാനാകുമെന്നും സ്റ്റിമാച്ച് പറഞ്ഞു. അതേസമയം, കളിയുടെ മുഴുവന്‍ ടിക്കറ്റുകളും വിറ്റുതീര്‍ന്നിട്ടുണ്ട്. ആരാധകരോട് ഗ്രൗണ്ടിലെത്തി ടീമിനെ പിന്തുണക്കണമെന്ന് സ്റ്റിമാച്ച് ആവശ്യപ്പെട്ടിരുന്നു. ഇതിനെ തുടര്‍ന്നായിരുന്നു അന്‍പതിനായിരത്തോളം വരുന്ന ടിക്കറ്റുകള്‍ വിറ്റുതീര്‍ന്നത്. കാണികളില്‍നിന്ന് മികച്ച പിന്തുണയും ലഭിക്കുകയാണെങ്കില്‍ ഇന്ത്യക്ക് ജയിക്കാമെന്ന പ്രതീക്ഷയുണ്ട്. ഇന്ത്യന്‍ പ്രതിരോധ താരമായ സന്ദേഷ് ജിങ്കന്റെ പരുക്ക് ഇന്ത്യക്ക് തിരിച്ചടിയായേക്കും.
ജിങ്കന് പകരം അനസ് ഒരു പക്ഷെ ഇന്ന് ആദ്യ ഇലവനില്‍ സ്ഥാനം പിടിക്കും. ആദില്‍ ഖാന്‍, നരേന്ദര്‍ ഘെലോട്ട് എന്നിവരായിരിക്കും ഇന്ന് ഇന്ത്യയുടെ പ്രതിരോധം കാക്കുക. മുന്നേറ്റനിരയില്‍ മലയാളി താരം ആഷിഖ് കുരുണിയനും സ്ഥാനം പിടിക്കും.