ഗൂഡല്ലൂര്‍: ഗൂഡല്ലൂര്‍, പന്തല്ലൂര്‍ താലൂക്കുകളിലെ തേയിലത്തോട്ടങ്ങളില്‍ റെഡ് സ്‌പൈഡര്‍ രോഗം പടരുന്നതായി റിപ്പോര്‍ട്ട്. രണ്ട് താലൂക്കുകളിലെയും ജനങ്ങളുടെയും സമ്പദ്ഘടനയെ നിയന്ത്രിക്കുന്നത് തേയില കൃഷിയാണ്. താലൂക്കുകളില്‍ വന്‍കിട തോട്ടങ്ങള്‍ക്ക് പുറമെ ചെറുകിട തോട്ടങ്ങളും പ്രവര്‍ത്തിച്ചു വരുന്നു. ഇവയെ ആശ്രയിച്ച് പതിനായിരത്തോളം തൊഴിലാളികളും ഉണ്ട്. കാലവര്‍ഷം നേരത്തെ വിട വാങ്ങിയതോടെ തേയിലത്തോട്ടങ്ങളില്‍ റെഡ് സ്‌പൈഡര്‍ എന്ന ചുവന്ന ചിലന്തിയുടെ രോഗവും വ്യാപകമായിട്ടുണ്ട്. ചെടികളില്‍ കയറികൂടുന്ന അതിസൂശ്മമായ ചുവന്ന നിറത്തിലുള്ള അണുക്കള്‍ ചെടിയുടെ ജലാംശം ഊറ്റിക്കുടിച്ച് നശിപ്പിക്കുകയാണ് പതിവ്. രോഗം പടര്‍ന്നതോടെ താലൂക്കുകളില്‍ തേയില ഉല്‍പാദനം ഗണ്യമായി കുറഞ്ഞിട്ടുണ്ട്.