കോഴിക്കോട്: സൂര്യപ്രകാശത്തെ സ്വന്തം കൈകൊണ്ട് മറച്ചുപിടിക്കുന്നതു പോലെയാണ് ആചാരസംരക്ഷണത്തിനായി ചിലരെങ്കിലും പരിശ്രമിക്കുന്നതെന്ന് സാമൂഹ്യവിമര്‍ശകന്‍ കെ.ടി കുഞ്ഞിക്കണ്ണന്‍ അഭിപ്രായപ്പെട്ടു. ശാസ്ത്രപുരോഗതി മനസിലാക്കി ജീവിക്കാന്‍ പരിഷ്‌കൃത സമൂഹത്തിന് ആകണമെന്നും അദ്ദേഹം പറഞ്ഞു. കോഴിക്കോട് ടൗണ്‍ ഹാളില്‍ നടന്ന ക്ഷേത്രപ്രവേശന വിളംബരം വാര്‍ഷികാഘോഷ ചടങ്ങില്‍ പ്രഭാഷണം നടത്തുകയായിരുന്നു അദ്ദേഹം.
ആചാരങ്ങളുടെ പേരില്‍ ഇന്നു നടക്കുന്നത് തെറ്റായ ചര്‍ച്ചകളും നിലപാടുകളുമാണ്. ശബരിമല വിഷയത്തില്‍ നടക്കുന്നത് അനാവശ്യ വിവാദങ്ങളാണ്. സമൂഹത്തെ പിന്നോട്ടു നടത്താനും ജാതിവ്യവസ്ഥയെ തിരികെ കൊണ്ടുവരാനുമാണു സവര്‍ണ മേധാവിത്തം എക്കാലത്തും ശ്രമിച്ചുകൊണ്ടിരിക്കുന്നത്. പരിവര്‍ത്തനത്തെ മാറ്റി നിര്‍ത്താന്‍ ആര്‍ക്കുമാകില്ലെന്നും കെ.ടി കുഞ്ഞിക്കണ്ണന്‍ പറഞ്ഞു.