റിയാദ്: സഊദിയില്‍ സ്വകാര്യ മേഖലയില്‍ ആവശ്യമായ തൊഴില്‍ വിസകള്‍ക്ക് മന്ത്രാലയത്തില്‍ നേരിട്ട് അപേക്ഷ സമര്‍പ്പിക്കാവുന്ന തരത്തിലേക്ക് വിസാ സമ്പ്രദായത്തില്‍ മാറ്റം വരുത്തി. സഊദികള്‍ക്ക് കൂടുതല്‍ തൊഴില്‍ നല്‍കുകയെന്ന ലക്ഷ്യത്തോടെ ആരംഭിച്ച നിതാഖാത്ത് പദ്ധതി പ്രകാരം ആരംഭിച്ച പ്രത്യേക വെബ് പോര്‍ട്ടലില്‍ നിശ്ചിത സമയം പരസ്യം ചെയ്ത ശേഷം സ്വദേശികളെ ലഭിച്ചില്ലെങ്കില്‍ മാത്രം വിദേശികള്‍ക്ക് വിസക്ക് അപേക്ഷിക്കുകയെന്ന വ്യവസ്ഥയാണ് എടുത്തു കളഞ്ഞത്. ഇതോടെ സ്ഥാപനങ്ങള്‍ക്ക് ആവശ്യമായ തൊഴിലാളികളെ റിക്രൂട്ട് ചെയ്യാന്‍ വിസകള്‍ക്ക് നേരിട്ട് അപേക്ഷിക്കാനാകുമെന്ന് അല്‍ മദീന പത്രം റിപ്പോര്‍ട്ട് ചെയ്തു.
വിസാ അപേക്ഷകള്‍ സമര്‍പ്പിക്കുന്നതിനു മുന്‍പായി സ്വകാര്യ സ്ഥാപനങ്ങളില്‍ ഒഴിവുള്ള തൊഴിലവസരങ്ങളെ കുറിച്ച് നാഷനല്‍ ലേബര്‍ ഗേറ്റ്‌വേ (താഖാത്ത്) പോര്‍ട്ടലില്‍ നിശ്ചിത കാലം പരസ്യം ചെയ്തിരിക്കണമെന്ന വ്യവസ്ഥ മന്ത്രാലയമാണ് എടുത്തുകളഞ്ഞത്. ഇനി മുതല്‍ തൊഴില്‍, സാമൂഹിക വികസന മന്ത്രാലയത്തിന്റെ വെബ്‌സൈറ്റ് വഴി നേരിട്ട് വിസാ അപേക്ഷകള്‍ സമര്‍പ്പിക്കുകയാണ് വേണ്ടത്. യോഗ്യരായ സഊദികള്‍ക്ക് തൊഴില്‍ നല്‍കണമെന്ന ലക്ഷ്യത്തോടെ ആരംഭിച്ചിരുന്ന ഈ വ്യവസ്ഥ മൂലം സ്വകാര്യ സ്ഥാപനങ്ങള്‍ക്ക് വിദേശങ്ങളില്‍ നിന്ന് വേഗത്തില്‍ തൊഴിലാളികളെ റിക്രൂട്ട് ചെയ്യുന്നതിന് സാധിക്കുമായിരുന്നില്ല. ഇത് മൂലം സ്വകാര്യ മേഖലയില്‍ നേരിടുന്ന പ്രതിസന്ധി കണക്കിലെടുത്താണ് നടപടിയെന്നാണ് കരുതുന്നത്.