ഡെറാഡൂണ്‍: പശുക്കളെ സംരക്ഷിക്കുന്നിടത്ത് മദ്യഷാപ്പും പ്രവര്‍ത്തിക്കുന്നതിനെതിരേ ജനങ്ങള്‍ പ്രക്ഷോഭത്തിലേക്ക്. പാലിനൊപ്പം മദ്യവും വിതരണം ചെയ്യുന്ന സര്‍ക്കാര്‍ നയം അനുവദനീയമല്ലെന്ന് വ്യക്തമാക്കിയാണ് സംസ്ഥാന ബി.ജെ.പി-വിശ്വഹിന്ദു പരിഷത്ത് നേതൃത്വത്തെയും സര്‍ക്കാരിനെയും പ്രതിക്കൂട്ടിലാക്കി സ്ത്രീകള്‍ ഉള്‍പ്പെടെയുള്ളവര്‍ പ്രക്ഷോഭവുമായി രംഗത്തെത്തിയത്. പശു സംരക്ഷകരെന്ന് വ്യക്തമാക്കി വിശ്വഹിന്ദു പരിഷത്താണ് ശ്രീനഗര്‍ പ്രദേശത്ത് ഗോശാല നിര്‍മിച്ചത്. എന്നാല്‍ 2017-18 സാമ്പത്തിക വര്‍ഷത്തില്‍ 2,000 കോടി രൂപയുടെ അധിക വരുമാനം ലക്ഷ്യമിട്ട് ഉത്തരാഖണ്ഡ് സര്‍ക്കാര്‍ സംസ്ഥാനത്ത് മദ്യശാലകള്‍ തുറക്കുന്ന പുതിയ മദ്യനയം നടപ്പാക്കിയിരിക്കുകയാണ്. ഇത്തരത്തില്‍ പുതിയ മദ്യഷാപ്പ് ശ്രീനഗര്‍ പട്ടണത്തില്‍ തുടങ്ങാനുള്ള നീക്കമാണ് ജനങ്ങളെ പ്രകോപിപ്പിച്ചത്. ഒരേ സമയം പാലും മദ്യവും എന്ന നയം ശരിയല്ലെന്ന് ചൂണ്ടിക്കാട്ടിയാണ് പ്രതിഷേധക്കാര്‍ രംഗത്തെത്തിയത്.