കുമ്പള: ദമ്പതികളെ കാര്‍ തടഞ്ഞുനിര്‍ത്തി അക്രമിച്ച കേസില്‍ പ്രതികളെ റിമാന്‍ഡ് ചെയ്തു. കൊടിയമ്മ സ്വദേശികളായ എ. അഹ്മദ് നൗഫല്‍ (24), അബ്ദുല്‍ ലത്വീഫ് (24), ജാഫര്‍ സിദ്ദീഖ് (24), മുഹമ്മദ് ജലീല്‍ (30), അബ്ദുല്ല ഫസല്‍ (24) എന്നിവരാണ് റിമാന്‍ഡിലായത്.
കൊടിയമ്മയിലെ പ്രവാസിയായ ഇബ്രാഹിം (38), ഭാര്യ ജമീല (28) എന്നിവരെയാണു പ്രതികള്‍ അക്രമിച്ചത്. സംഭവത്തില്‍ പൊലിസ് കേസെടുത്തതോടെ പ്രതികള്‍ മുന്‍കൂര്‍ ജാമ്യാപേക്ഷ നല്‍കിയിരുന്നു. എന്നാല്‍, ജില്ലാ കോടതിയും ഹൈക്കോടതിയും തള്ളിയതിനെ തുടര്‍ന്ന് കുമ്പള പൊലിസാണ് പ്രതികളെ അറസ്റ്റ് ചെയ്തത്.
ഇക്കഴിഞ്ഞ ഓഗസ്റ്റ് 26നാണ് കേസിനാസ്പദമായ സംഭവം നടന്നത്. ജമീലയുടെ ബന്ധുവിന്റെ വിവാഹത്തില്‍ സംബന്ധിച്ച് കാറില്‍ തിരികെ പോകുന്നതിനിടെ കൊടിയമ്മ പള്ളിക്കു സമീപത്ത് സംഘം കാര്‍ തടഞ്ഞുനിര്‍ത്തുകയായിരുന്നു. തുടര്‍ന്ന് ഇബ്രാഹിമിനെയും ജമീലയെയും ഇരുവരും അക്രമിച്ചുവെന്നാണ് കേസ്. മൂന്നു വര്‍ഷംമുന്‍പ് ഒരു വാട്‌സ്ആപ്പ് മെസേജിന്റെ പേരിലുണ്ടായ പ്രശ്‌നമാണു പുതിയ സംഭവത്തിലേക്കു നയിച്ചത്. പ്രശ്‌നം നേരത്തെ പറഞ്ഞുതീര്‍ത്തിരുന്നു. എന്നാല്‍, വീണ്ടും ഇതേ കാരണം ചൂണ്ടിക്കാണിച്ച് പ്രതികള്‍ ദമ്പതികളെ അക്രമിക്കുകയായിരുന്നു.