പഴയങ്ങടി: മണല്‍ മാഫിയകള്‍ക്ക് പൊലിസിന്റെ രഹസ്യനീക്കങ്ങള്‍ ചോര്‍ത്തി കൊടുക്കുന്നുവെന്നാരോപിച്ച് പഴയങ്ങാടി പൊലിസ് സ്റ്റേഷനിലെ സി.പി.ഒ അനില്‍കുമാറിനെ കണ്ണൂര്‍ജില്ലാ പൊലിസ് സൂപ്രണ്ട് ശിവ വിക്രം സസ്‌പെന്റ് ചെയ്തു. പഴയങ്ങാടി എസ്.ഐ ബിനു മോഹനന്റെ നേതൃത്വത്തില്‍ മാടായി,മാട്ടൂല്‍ ഭാഗങ്ങളിലെ കടല്‍ പ്രദേശത്തേ മണല്‍ കടത്തിനെതിരെ ശക്തമായ നടപടിയുമായി മുന്നോട്ട് പോയിരുന്നു. മണല്‍ കടത്തുമായി നിരവധി വാഹനങ്ങള്‍ പിടിച്ചെടുക്കുകയും ആയിരക്കണക്കിന് രൂപ പിഴ ഈടാക്കുകയും ചെയ്തിരുന്നു. രാത്രി കാലങ്ങളില്‍ നടത്തുന്ന റെയ്ഡുകളില്‍ സജീവമായി അനില്‍കുമാറും ഉണ്ടായിരുന്നു. ചിലരഹസ്യ നീക്കങ്ങള്‍ മണല്‍ മാഫി കൃത്യമായി അറിയുന്നു എന്ന സംശയത്തില്‍ എസ്.ഐ നടത്തിയ അന്വേഷണ വിവരം ഡിവൈ.എസ്.പിക്ക് നല്‍കിയതിന്റെ അടിസ്ഥാനത്തില്‍ ഡിവെ.എസ്.പി നല്‍കിയ റിപ്പോര്‍ട്ടിന്‍മേല്‍ എസ്.പി നടപടിയെടുക്കുകയായിരുന്നു.