ന്യൂഡല്‍ഹി: റാഫേല്‍ കരാര്‍ സംബന്ധിച്ച ആരോപണങ്ങളില്‍ വാദം കേള്‍ക്കവെ വ്യോമസേന ഉദ്യോഗസ്ഥനോട് ഉടനടി കോടതിയില്‍ ഹാജരാകാന്‍ നിര്‍ദേശിച്ച് ചീഫ് ജസ്റ്റിസ് രഞ്ജന്‍ ഗോഗോയ്. വിമാനങ്ങളുടെ സാങ്കേതിക വിവരങ്ങള്‍ വ്യോമസേന ഉന്നത ഉദ്യോഗസ്ഥര്‍ വിശദീകരിക്കണമെന്ന് സുപ്രീം കോടതി നിര്‍ദേശിച്ചു. പ്രതിരോധ മന്ത്രാലയത്തിന്റെ ഉദ്യോഗസ്ഥര്‍ ഇത് വിശദീകരിക്കേണ്ടെന്നായിരുന്നു കോടതിയുടെ തീര്‍പ്പ്.

10 മിനിട്ടിനുള്ളില്‍ എയര്‍ഫോഴ്‌സ് ഉദ്യോഗസ്ഥന് കോടതിയിലെത്താന്‍ സാധിക്കുമെന്ന് അറ്റോര്‍ണി ജനറല്‍ പറഞ്ഞതോടെ ഇപ്പോള്‍ വാദം കേള്‍ക്കുമ്പോള്‍ ഉദ്യോഗസ്ഥന്‍ കോടതിയിലുണ്ടാവണം എന്നായിരുന്നു ചീഫ് ജസ്റ്റിസിന്റെ മറുപടി. പ്രതിരോധ മന്ത്രാലയത്തിലെ ഏതെങ്കിലും ഉദ്യോഗസ്ഥന്‍ ഹാജരായി കാര്യങ്ങള്‍ വിശദീകരിക്കാമെന്ന് അറ്റോര്‍ണി ജനറല്‍ കോടതിയെ അറിയിച്ചെങ്കിലും കോടതി അത് അംഗീകരിച്ചില്ല.

ഹര്‍ജിക്കാരുടെ വാദമാണ് കോടതിയില്‍ നടന്നത്. മുഴുവന്‍ നടപടിക്രമങ്ങളും തെറ്റിച്ചുകൊണ്ടാണ് ഇടപാട് നടന്നതെന്നും ഹര്‍ജിക്കാര്‍ വാദിച്ചു. തുടര്‍ന്നാണ് സാങ്കേതിക വശങ്ങളിലേക്ക് കോടതി കടന്നത്.

റാഫേലില്‍ ആയുധങ്ങളുടെ വിലവിവരങ്ങള്‍ എല്ലാം പറയാനാവില്ലെന്നും ആയുധസജ്ജമായ വിമാനത്തിന്റെ വില പുറത്തുവിടാനാവില്ലെന്നും കേന്ദ്രസര്‍ക്കാരിന് വേണ്ടി അറ്റോര്‍ണി ജനറല്‍ അറിയിച്ചു. ആയുധങ്ങളുടെ കാര്യത്തില്‍ രഹസ്യ സ്വഭാവമുണ്ടായില്ലെങ്കില്‍ അത് ശത്രുരാജ്യങ്ങളെ സഹായിക്കുമെന്നായിരുന്നു വാദം. വിമാനത്തിന്റെ അടിസ്ഥാന വിലയും മറ്റ് സജ്ജീകരണങ്ങളുടെ വിലയും കോടതിയെ അറിയിച്ചിട്ടുണ്ടെന്നും അറ്റോര്‍ണി ജനറല്‍ പറഞ്ഞു.