കൊടുങ്ങല്ലൂര്‍: വിദേശമദ്യ വില്‍പ്പനശാലകളില്‍ നിന്നും മദ്യം വാങ്ങി വീട്ടില്‍ ശേഖരിച്ച് ആവശ്യക്കാര്‍ക്ക് ബൈക്കില്‍ സഞ്ചരിച്ച് വില്‍പ്പന നടത്തിയ യുവാവ് എക്‌സൈസിന്റെ പിടിയിലായി. എടവിലങ്ങ് കുഞ്ഞയിനി സ്വദേശി ശ്രീകണ്ഠന്‍ (27) നെയാണ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.കെ. അഷറഫും സംഘവും അറസ്റ്റ് ചെയ്തത്. വീട്ടില്‍ ശേഖരിച്ച മദ്യം മൊബൈല്‍ ഫോണിലൂടെ ആവശ്യപ്പെട്ടവര്‍ക്ക് റോഡരികില്‍ വെച്ച് കൈമാറുന്നതിനിടയിലാണ് പിടിയിലായത്. മദ്യം വാങ്ങാന്‍ വന്നയാള്‍ ഓടി രക്ഷപ്പെട്ടു. അര ലിറ്ററിന്റെ അഞ്ച് കുപ്പികളും മദ്യം വിറ്റുകിട്ടിയ 1200 രൂപയും കസ്റ്റഡിയിലെടുത്തു. ഇയാള്‍ മുമ്പ് ബസ് കണ്ടക്ടറെ കുത്തികൊന്ന കേസിലും പ്രതിയാണ്. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു. ഉദ്യോഗസ്ഥരായ എ.ബി. സുനില്‍, എം.ആര്‍. നെല്‍സണ്‍, ടി.ആര്‍. സുനില്‍, ടി.കെ. അബ്ദുള്‍നിയാസ്, ടി.എസ്. സുനില്‍കുമാര്‍, ഫ്രെന്‍സി എന്നിവരും എക്‌സൈസ് സംഘത്തിലുണ്ടായിരുന്നു.