മദീന: രാജ്യത്തെ നടുക്കിയ മദീന ബസ് അപകടത്തില്‍ ഏഴ് ഇന്ത്യക്കാര്‍ മരിച്ചതായി ജിദ്ദയിലെ ഇന്ത്യന്‍ കോണ്‍സുലേറ്റ് സ്ഥിരീകരിച്ചു. അപകടത്തെ തുടര്‍ന്ന് ഇവരെ കാണാനില്ലെന്നാണ് കോണ്‍സുലേറ്റ് പ്രസ്താവനയില്‍ വ്യക്തമാക്കിയത്. ഇവരുടെ പേര് വിവരങ്ങള്‍ കോണ്‍സുലേറ്റ് പുറത്ത് വിടുകയും ചെയ്തിട്ടുണ്ട്. മരിച്ചവരില്‍ അഞ്ചു പേര്‍ ഉത്തര്‍ പ്രദേശ് സ്വദേശികളും ബിഹാര്‍, പശ്ചിമ ബംഗാള്‍ എന്നീ സംസ്ഥാനങ്ങളിലെ ഓരോരുത്തരുമാണ്. പൂനെ സ്വദേശികളായ ദമ്പതികളാണ് പരിക്കേറ്റ് ചികിത്സയില്‍ കഴിയുന്നത്.

ഇക്കഴിഞ്ഞ ബുധനാഴ്ച മദീനമക്ക എക്‌സ്പ്രസ്സ് വെയില്‍ നടന്ന ദാരുണമായ അപകടത്തില്‍ വിവിധ രാജ്യക്കാരായ 35 പേര്‍ മരിക്കുകയും നാലു പേര്‍ക്ക് പരിക്കേല്‍ക്കുകയും ചെയ്തിരുന്നു. ഇവരില്‍ ബിഹാര്‍ മുസഫര്‍പുര്‍ സ്വദേശി അശ്‌റഫ് ആലം, യു.പി സ്വദേശികളായ ഫിറോസ് അലി, അഫ്താബ് അലി, നൗഷാദ് അലി, സീശാന്‍ ഖാന്‍, ബിലാല്‍, പശ്ചിമ ബംഗാള്‍ സ്വദേശി മുഖ്താര്‍ അലി എന്നിവരാണ് മരിച്ച ഇന്ത്യക്കാര്‍. ഈ ഏഴുപേരുടെയും വിശദ വിവരങ്ങള്‍ സഊദി അധികൃതര്‍ക്ക് ഇന്ത്യന്‍ കോണ്‍സുലേറ്റ് കൈമാറിയിട്ടുണ്ട്.

മദീന കിംഗ് ഫഹദ് ആശുപത്രിയില്‍ ചികിത്സയില്‍ കഴിയുന്ന പൂനെ സ്വദേശികളായ മതീന്‍ ഗുലാം, ഭാര്യ സീബ നിസാം ദമ്പതികള്‍ക്ക് സാധ്യമായ എല്ലാ സഹായവും ചെയ്യുന്നുണ്ടെന്നും കോണ്‍സുലേറ്റ് വ്യക്തമാക്കി. കൂടുതല്‍ വിവരങ്ങള്‍ക്ക് കോണ്‍സുലേറ്റിന്റെ 0500127992, 0556122301 നമ്പറുകളില്‍ ബന്ധപ്പെടാവുന്നതാണ്.

അതേസമയം, അപകടത്തില്‍ വിശദ വിവരങ്ങള്‍ ഇതുവരെ സഊദി അധികൃതര്‍ ഇതുവരെ പുറത്തു വിട്ടിട്ടില്ല. മൃതദേഹങ്ങള്‍ കത്തിക്കരിഞ്ഞ നിലയിലായതിനാല്‍ കൂടുതല്‍ പരിശോധന നടത്തിയ ശേഷമേ വിശദ വിവരങ്ങള്‍ ലഭ്യമാവുകയുള്ളൂ. അപകടം നടന്നയുടനെ തന്നെ ജിദ്ദയിലെ ഇന്ത്യന്‍ കോണ്‍സുലേറ്റ് അപകടസ്ഥലത്തേക്ക് പ്രതിനിധികളെ അയച്ചിരുന്നു.

റിയാദില്‍ നിന്ന് ബംഗ്‌ളാദേശ് സ്വദേശികള്‍ നടത്തുന്ന ഉംറ ഗ്രൂപ്പില്‍ 39 ഉംറ തീര്‍ഥാടകരുമായി മദീന വഴി മക്കയിലേക്ക് പോകുകയായിരുന്ന ബസ് ഉക്ഹുലില്‍ മണ്ണുമാന്തി യന്ത്രവുമായി ഇടിച്ച് കത്തിയാണ് അപകടമുണ്ടായത്. ഏഷ്യന്‍, അറബ് വംശജരാണ് അപകടത്തില്‍ പെട്ടതെന്നാണ് പറഞ്ഞിരുന്നതെങ്കിലും ഇന്ത്യക്കാര്‍ ഉള്‌പ്പെട്ടിട്ടില്ലെന്നായിരുന്നു ഇത് വരെയുള്ള വിവരം.