കൂത്തുപറമ്പ്: പൊലിസ് നടത്തിയ വാഹന പരിശോധനയ്ക്കിടെ ഓംനി വാനില്‍ കടത്തുകയായിരുന്ന 228 കുപ്പി മാഹി മദ്യവുമായി ഒരാളെ പിടികൂടി. മറ്റൊരാള്‍ ഓടിപ്പോയി. ബുധനാഴ്ച രാത്രി ഒമ്പതരയോടെ കണ്ടംകുന്നില്‍ വച്ചാണ് സംഭവം. എരഞ്ഞോളി ചുങ്കത്തെ സി. ഹേമന്ത് (25) ആണ് അറസ്റ്റിലായത്. ഇയാളുടെ കൂടെ വാഹനത്തിലുണ്ടായിരുന്ന എരഞ്ഞോളി കുടക്കളത്തെ പ്രണവാണ് ഓടിപ്പോയതെന്ന് പൊലിസ് പറഞ്ഞു.
മദ്യം കടത്താനുപയോഗിച്ച ഓംനി വാനും പൊലിസ് കസ്റ്റഡിയിലെടുത്തു. എസ്.ഐ കെ.വി നിഷിത്തിന്റെ നേതൃത്വത്തില്‍ കൂത്തുപറമ്പ് പൊലിസും ഹൈവേ പൊലിസും ചേര്‍ന്നായിരുന്നു വാഹനപരിശോധന നടത്തിയിരുന്നത്. പൊലിസ് കൈകാണിച്ചിട്ടും മട്ടന്നൂര്‍ ഭാഗത്തേക്ക് നിര്‍ത്താതെ ഓടിച്ചു പോയ ഓംനി വാനിനെ പിന്തുടര്‍ന്ന് കണ്ടംകുന്ന് ബസ് സ്റ്റോപ്പിനടുത്ത് വച്ചാണ് പൊലിസ് പിടികൂടിയത്. പതിനൊന്ന് പെട്ടികളിലായി സൂക്ഷിച്ച 500 മില്ലിയുടെ 228 കുപ്പി മദ്യമാണ് കസ്റ്റഡിയിലെടുത്തത്. ഓടിപ്പോയ പ്രണവിനെ പിടികൂടാന്‍ ഊര്‍ജിത അന്വേഷണം തുടങ്ങിയതായി പൊലിസ് പറഞ്ഞു.