ന്യൂഡല്‍ഹി: വോട്ടിങ് യന്ത്രത്തില്‍ ആര്‍ക്ക് വോട്ട് ചെയ്താലും ബി.ജെ.പിക്ക് ലഭിക്കുമെന്ന് പറഞ്ഞ ഹരിയാനയിലെ സ്ഥാനാര്‍ഥിയാണ് ബി.ജെ.പിയിലെ ഏറ്റവും സത്യസന്ധനായ മനുഷ്യനെന്ന് രാഹുല്‍ ഗാന്ധി.
ട്വിറ്ററിലൂടെയാണ് ഹരിയാന എം.എല്‍.എ ബക്ഷിഷ് സിങ് വിര്‍ക്കിനെ രാഹുല്‍ പരിഹസിച്ചത്.
ഏത് ബട്ടന്‍ അമര്‍ത്തിയാലും വോട്ട് ഭരണകക്ഷിയായ ബി.ജെ.പിക്ക് ലഭിക്കുമെന്ന് കഴിഞ്ഞ ദിവസം അസന്ധ് മണ്ഡലത്തില്‍ നടന്ന തെരഞ്ഞെടുപ്പ് പൊതുയോഗത്തില്‍വച്ചാണ് ബക്ഷിഷ് സിങ് പ്രസംഗിച്ചത്. നിങ്ങള്‍ ആര്‍ക്ക് വോട്ട് ചെയ്താലും ഞങ്ങള്‍ക്ക് അറിയാന്‍ കഴിയും. അറിയില്ലെന്ന് നിങ്ങള്‍ കരുതേണ്ട. ആവശ്യമുണ്ടെങ്കില്‍ അത് കണ്ടെത്താന്‍ സാധിക്കും. കാരണം മോദിയും (പ്രധാനമന്ത്രി) മനോഹര്‍ലാലും (ഹരിയാന മുഖ്യമന്ത്രി) ബുദ്ധിമാന്മാരാണ്-ബക്ഷിഷ് പറഞ്ഞു.