സൂറിച്ച്: സ്വിറ്റ്‌സര്‍ലന്‍ഡിന്റെ തട്ടകത്തില്‍ നടന്ന ഖത്തര്‍-സ്വിറ്റ്‌സര്‍ലന്‍ഡ് സൗഹൃദ ഫുട്‌ബോള്‍ മത്സരത്തില്‍ ഖത്തറിന് ചരിത്ര ജയം. എതിരില്ലാത്ത ഒരു ഗോളിന് സ്വിസ് ടീമിനെ പരാജയപ്പെടുത്തിയാണ് ഖത്തര്‍ ടീം അവരുടെ ചരിത്ര ജയം സ്വന്തമാക്കിയത്. ലിവര്‍പൂള്‍ താരം ഷാകിരിയടക്കമുള്ള പ്രമുഖരുള്ള ടീമിനെയാണ് 96-ാം സ്ഥാനത്ത് നില്‍ക്കുന്ന ഖത്തര്‍ പരാജയപ്പെടുത്തിയത്. ഫിഫ റാങ്കിങ്ങില്‍ എട്ടാം സ്ഥാനത്ത് നില്‍ക്കുന്ന ടീമിനെ പരാജയപ്പെടുത്തിയതോടെ ടീമിന്റെ ആത്മവിശ്വാസം വര്‍ധിച്ചെന്ന് പരിശീലകന്‍ പറഞ്ഞു.
ഖത്തര്‍ ലോകകപ്പില്‍ ടീമിനെ പങ്കെടുപ്പിക്കുമ്പോള്‍ ഇതുപോലുള്ള ടീമിനെയാണ് ഉദ്ദേശിക്കുന്നതെന്നും അദ്ദേഹം കൂട്ടിച്ചേര്‍ത്തു. അതിനായാണ് ഇനിയുള്ള മത്സരങ്ങളെന്നും അദ്ദേഹം കൂട്ടിച്ചേര്‍ത്തു. കളിയുടെ തുടക്കം മുതല്‍തന്നെ സ്വിസ്പട ഖത്തര്‍ ഗോള്‍മുഖത്ത് നിരന്തരം അക്രമം അഴിച്ച് വിട്ടുകൊണ്ടേയിരുന്നു. ഖത്തര്‍ പ്രതിരോധവും ഗോള്‍കീപ്പറും ചേര്‍ന്നാണ് സ്വിസ് ടീമിന്റെ ഓരോ ഗോള്‍ശ്രമവും പരാജയപ്പെടുത്തി ടീമിനെ രക്ഷിച്ചത്. ഒടുവില്‍ 85-ാം മിനുട്ടില്‍ കൗണ്ടര്‍ അറ്റാക്കില്‍ നിന്നായിരുന്നു ഖത്തറിന്റെ ചരിത്ര ഗോള്‍ പിറന്നത്. ആകിഫാണ് ഖത്തറിനായി ഗോള്‍നേടിയത്. യൂറോപ്യന്‍ രാജ്യത്ത് ഖത്തറിന്റെ രണ്ടാമത്തെ ജയംകൂടിയാണിത്. സ്വിറ്റ്‌സര്‍ലന്‍ഡ് കളിച്ച അവസാനത്തെ 12 ഹോം മത്സരങ്ങളിലെ ആദ്യ തോല്‍വി കൂടിയായിരുന്നു കഴിഞ്ഞ ദിവസത്തേത്.