തിരുവനന്തപുരം: പകര്‍ച്ചപ്പനി പ്രതിരോധത്തിന് ഊര്‍ജിത നടപടികളുമായി തദ്ദേശ സ്വയംഭരണ സ്ഥാപനങ്ങള്‍. നാളെ രാവിലെ 10ന് എല്ലാ തദ്ദേശസ്ഥാപന ഭരണസമിതികളും അടിയന്തര യോഗം ചേര്‍ന്ന് പ്രതിരോധ, ശുചീകരണ പ്രവര്‍ത്തനങ്ങള്‍ ആസൂത്രണം ചെയ്യുമന്ന് മന്ത്രി കെ.ടി ജലീല്‍ വാര്‍ത്താസമ്മേളനത്തില്‍ അറിയിച്ചു.
ഉച്ചയ്ക്കു ശേഷവും സേവനം ലഭ്യമാക്കാന്‍ പ്രൈമറി ഹെല്‍ത്ത് സെന്ററുകളില്‍ ഒരു ഡോക്ടറെയും ഒരു പാരാമെഡിക്കല്‍ സ്റ്റാഫിനെയും കമ്മ്യൂണിറ്റി ഹെല്‍ത്ത് സെന്ററുകളില്‍ രണ്ടു ഡോക്ടര്‍മാരെയും രണ്ടു പാരാമെഡിക്കല്‍ സ്റ്റാഫുകളെയും നിയമിക്കും. സേവനമേഖലയ്ക്കു നീക്കിവയ്ക്കുന്ന പ്ലാന്‍ ഫണ്ട് ഉപയോഗപ്പെടുത്തിയാണ് ഇവരെ നിയമിക്കുക.
ഈ മാസം 27, 28, 29 തിയതികളില്‍ ശുചീകരണ ദിനം ആചരിക്കും. മാലിന്യ സംസ്‌കരണ യൂനിറ്റുകള്‍ എല്ലാ തദ്ദേശസ്ഥാപനങ്ങളിലും ഉറപ്പുവരുത്താന്‍ സര്‍ക്കാര്‍ നടപടി സ്വീകരിച്ചിട്ടുണ്ട്.
ഓരോ തദ്ദേശ വാര്‍ഡിലും 25,000 രൂപ വീതം ശുചീകരണ പ്രവര്‍ത്തനങ്ങള്‍ക്കു ചെലവഴിക്കാന്‍ ഉത്തരവിറക്കിയിട്ടുണ്ട്. കൊതുകു നിവാരണം ലക്ഷ്യമിട്ടുള്ള പ്രവര്‍ത്തനങ്ങള്‍ക്കായിരിക്കണം ഇത് വിനിയോഗിക്കുന്നതെന്ന് ഉറപ്പുവരുത്തണം. ഇതിനു മോണിറ്ററിങ് സംവിധാനമുണ്ടാക്കുമെന്നും മന്ത്രി പറഞ്ഞു.