പാരിസ്: ഈ വര്‍ഷത്തെ ബാലണ്‍ ഡി ഓര്‍ പുരസ്‌കാരങ്ങള്‍ക്കുള്ള ചുരുക്കപ്പട്ടികയില്‍നിന്ന് ജൂനിയര്‍ നെയ്മറും ലൂക്കാ മോഡ്രിച്ചും പുറത്ത്. 30 അംഗ ചുരുക്കപ്പട്ടികയില്‍ ലിവര്‍പൂളിന്റെ വിര്‍ജില്‍ വാന്‍ഡിക്കും ബാഴ്‌സലോണയുടെ സ്‌ട്രൈക്കര്‍ ലയണല്‍ മെസ്സിയും യുവന്റസ് സ്റ്റാര്‍ ക്രിസ്റ്റ്യാനോ റൊണാള്‍ഡോയും തമ്മിലാണ് പ്രധാന പോര്. അഗ്യുറോ, എംബാപ്പെ, ബെന്‍സേമ, ലെവന്‍ഡോവ്‌സ്‌കി, ഗ്രീസ്മാന്‍, സ്‌റ്റെര്‍ലിങ്, ഈഡന്‍ ഹസാര്‍ഡ്, സാദിയോ മാനെ, സലാഹ് തുടങ്ങിയവരും പട്ടികയില്‍ സ്ഥാനം പിടിച്ചു. കഴിഞ്ഞതവണ ബാലണ്‍ ഡി ഓര്‍ സ്വന്തമാക്കിയ റയലിന്റെ മോഡ്രിച്ചും നെയ്മറും ഇടംപിടിച്ചില്ല എന്നതാണ് ശ്രദ്ധേയം.
പരുക്കും സസ്‌പെന്‍ഷനും വിവാദങ്ങളുമാണ് നെയ്മറിന് ഇടം നല്‍കാതെ പോയതെങ്കില്‍ ഫോമില്ലായ്മയാണ് മോഡ്രിച്ചിന്റെ രണ്ടാമതൊരു പുരസ്‌കാരനേട്ടത്തിന് വിനയായത്.
വനിതാ ബാലന്‍ ഡി ഓറിനുള്ള അവസാന 20 പേരുടെ ഷോര്‍ട്ട് ലിസ്റ്റും ഒപ്പം ഇത്തവണ മുതല്‍ പുതുതായി ആരംഭിച്ച മികച്ച ഗോളിക്കുള്ള പുരസ്‌കാരത്തിനായുള്ള നോമിനേഷനുകളും പ്രഖ്യാപിച്ചിട്ടുണ്ട്. വനിതകളില്‍ റെയ്ന്‍ എഫ്.സി താരം മേഗന്‍ റാപ്പിനോ ആദ്യ സ്ഥാനത്ത് തന്നെ ഇടം കണ്ടെത്തി. ഗോള്‍കീപ്പര്‍മാരില്‍ ആലിസന്‍ ബെക്കറും ഉള്‍പ്പെട്ടിട്ടുണ്ട്.