തിരുവനന്തപുരം: ഒരു നിയമസഭാ തെരഞ്ഞെടുപ്പിന്റെ മുഴുവന്‍ വാശിയും ആവേശവും നിറഞ്ഞു നിന്ന അഞ്ച് മണ്ഡലങ്ങളിലേക്ക് നടന്ന തെരഞ്ഞെടുപ്പിന്റെ ഫലമറിയാന്‍ ഇനി നിമിഷങ്ങള്‍ മാത്രം. എട്ടു മണിക്ക് വോട്ടെണ്ണല്‍ ആരംഭിക്കും. ആദ്യ ഫലസൂചനകള്‍ രാവിലെ 8.30ഓടെ പുറത്തുവരും. വട്ടിയൂര്‍ക്കാവ്, അരൂര്‍, എറണാകുളം, കോന്നി, മഞ്ചേശ്വരം എന്നീ നിയമസഭാ മണ്ഡലങ്ങളിലേക്കാണ് ഉപതെരഞ്ഞെടുപ്പ് നടന്നത്.

രാവിലെ എട്ടോടെ വരണാധികാരിയുടെ സാന്നിധ്യത്തില്‍ സീല്‍ പൊട്ടിച്ച് സ്ട്രോംഗ് റൂമുകള്‍ തുറന്ന് യന്ത്രങ്ങളും വി.വി പാറ്റും കൗണ്ടിങ് ടേബിളുകളിലേക്ക് മാറ്റും. പോസ്റ്റല്‍ വോട്ടുകള്‍ എണ്ണിക്കഴിഞ്ഞ ശേഷം ഇ.വി.എമ്മുകളിലേക്ക് കടക്കും. ഓരോ മണ്ഡലത്തിലെയും ബൂത്തെണ്ണം അനുസരിച്ച് റൌണ്ടുകളുടെ എണ്ണം വ്യത്യാസപ്പെടും.

നറുക്കിട്ടെടുക്കുന്ന അഞ്ചു ബൂത്തുകളിലെ വി.വി പാറ്റ് സ്ലിപ്പുകള്‍ കൂടി എണ്ണിക്കഴിഞ്ഞിട്ടേ അന്തിമഫലം ഒദ്യോഗികമായി പുറത്തുവിടൂ. ഓരോ മണ്ഡലത്തിലേയും ബൂത്ത് തിരിച്ചുള്ള കണക്കെടുപ്പിലാണ് മുന്നണികള്‍. അരൂര്‍ ഒഴികെയുള്ള നാല് മണ്ഡലങ്ങളും യു.ഡി.എഫിന്റെ സിറ്റിങ് സീറ്റാണ്. അതുകൊണ്ട് തന്നെ യു.ഡി.എഫ് ക്യാംപില്‍ അല്‍പം ആശങ്ക വര്‍ധിക്കുന്നുണ്ട്. പാലാ ഉപതെരഞ്ഞെടുപ്പില്‍ ചരിത്ര വിജയം സ്വന്തമാക്കിയ എല്‍.ഡി.എഫ് ആത്മവിശ്വാസത്തിലാണെങ്കിലും സിറ്റിങ് സീറ്റായ അരൂര്‍ മണ്ഡലത്തില്‍ കഴിഞ്ഞ തവണ ലീഡ് നേടിയ ഷാനി മോള്‍ ഉസ്മാന്‍ തന്നെയാണ് ഇത്തവണയും സ്ഥാനാര്‍ഥിയെന്നത് ആശങ്ക സൃഷ്ടിക്കുന്നുണ്ട്.