സ്വന്തം ലേഖകന്‍

ആലപ്പുഴ: തുടര്‍തോല്‍വികളില്‍ പതറിയില്ല. പോരാളിയായി വാശിയോടെ തന്നെ പൊരുതി. അരൂരിലെ ചുവപ്പുകോട്ട തകര്‍ത്തു ഷാനി മോള്‍ ഉസ്മാന്‍ ഒടുവില്‍ വിജയതീരത്ത്. രണ്ടു നിയമസഭാ തെരഞ്ഞെടുപ്പുകളിലും ലോക്‌സഭ പോരിലും തോല്‍വി മാത്രമായിരുന്നു കൈമുതല്‍. അരൂരിലെ സി.പി.എമ്മിന്റെ സിറ്റിങ് സീറ്റ് തന്നെ അട്ടിമറിയിലൂടെ കോണ്‍ഗ്രസിന് സമ്മാനിച്ച് ശക്തയെന്ന് തെളിയിച്ചു.
അരൂരിലെ അങ്കത്തട്ടില്‍ വിജയത്തില്‍ കുറഞ്ഞതൊന്നും ഷാനി മോളുടെ ലക്ഷ്യത്തില്‍ ഇല്ലായിരുന്നു. ഇനിയൊരു തോല്‍വി ചിന്തിക്കാന്‍ പോലുമാകുന്നതിനപ്പുറം. പോരാട്ടങ്ങളിലൂടെ കോണ്‍ഗ്രസിന്റെ നേതൃനിരയിലേക്ക് ഉയര്‍ന്ന വനിതയാണ് ഷാനി മോള്‍ ഉസ്മാന്‍. കെ.എസ്.യുവിലൂടെ രാഷ്ട്രീയരംഗത്ത് പിച്ചവച്ച ഷാനി മോളുടെ വളര്‍ച്ച പടിപടിയായി.
കേരളത്തില്‍നിന്ന് എ.ഐ.സി.സിയുടെ സെക്രട്ടറിയായി മാറിയ ആദ്യവനിത. കെ.എസ്.യു സംസ്ഥാന ഉപാധ്യക്ഷയില്‍ തുടങ്ങി യൂത്ത് കോണ്‍ഗ്രസിലും മഹിള കോണ്‍ഗ്രസിലും സംസ്ഥാന നേതൃനിരയില്‍ തിളങ്ങിയാണ് കോണ്‍ഗ്രസ് നേതൃത്വത്തിലേക്കുള്ള വരവ്.
ആലപ്പുഴ ജില്ലാപഞ്ചയത്ത് അംഗവും നഗരസഭ ചെയര്‍പേഴ്‌സണുമായി. 1990കളിലെ ജ്വലിക്കുന്ന വിദ്യാര്‍ഥി, യുവജന നേതാവായി മാറിയ വനിത എന്നിട്ടും നിയമസഭയിലേക്ക് മത്സരിക്കാന്‍ കോണ്‍ഗ്രസ് അവസരം നല്‍കിയത് 2006ല്‍ മാത്രം.
തനിക്കൊപ്പം പ്രവര്‍ത്തിച്ച യുവനേതാക്കളിലേറെയും എം.പിയും എം.എല്‍.എയുമൊക്കെയായി മാറുമ്പോഴും കാഴ്ചക്കാരിയുടെ റോളായിരുന്നു ഷാനി മോള്‍ക്ക്. മധ്യകേരളത്തിലെ സി.പി.എമ്മിന്റെ ശക്തികേന്ദ്രമായി കരുതുന്ന പെരുമ്പാവൂരിലായിരുന്നു 2006ല്‍ ആദ്യപോരാട്ടം. ഷാജു പോളിനോട് തോറ്റു. പിന്നീടൊരു സീറ്റിനായി 2016 വരെ കാത്തിരിക്കേണ്ടി വന്നു.
സി.പി.എമ്മിന്റെ കോട്ടയായിരുന്ന കാസര്‍കോട് ലോക്‌സഭ സീറ്റിലേക്ക് പരിഗണിച്ചെങ്കിലും ചാവേറാകാനില്ലെന്ന് പ്രഖ്യാപിച്ച് ഷാനി മോള്‍ പിന്മാറി. 2016 ല്‍ ഒറ്റപ്പാലം നിയമസഭ സീറ്റ് നല്‍കിയെങ്കിലും അവിടെയും പരാജയം. വിഷയങ്ങള്‍ നന്നായി പഠിച്ച് ദൃശ്യമാധ്യമങ്ങളിലൂടെ അവതരിപ്പിക്കുന്ന മികച്ചപ്രതിച്ഛായയുള്ള ഷാനി മോള്‍ക്ക് കഴിഞ്ഞ ലോക്‌സഭ തെരഞ്ഞെടുപ്പില്‍ കോണ്‍ഗ്രസ് ആലപ്പുഴ നല്‍കി. ശബരിമല വിഷയം ആഞ്ഞുവീശിയ കാറ്റില്‍ 19 ഇടത്ത് യു.ഡി.എഫ് ജയിച്ചു കയറിയപ്പോഴും ഷാനി മോള്‍ മാത്രം വീണു. അരൂരില്‍ ആരിഫിനേക്കാള്‍ 648 വോട്ടു കൂടുതല്‍ നേടിയിരുന്നു ഷാനി മോള്‍. ഉപതെരഞ്ഞെടുപ്പിന്റെ അവസാന നിമിഷമാണ് അരൂരില്‍ സ്ഥാനാര്‍ഥിത്വം ഉറപ്പിച്ചത്. കോട്ടക്കൊത്തളങ്ങളില്‍ കടന്നുകയറി ഷാനിമോള്‍ വീണ്ടും പ്രഹരിച്ചതോടെ അരൂരിലെ ഇടതുകോട്ട തകര്‍ന്നു. ഭൂരിപക്ഷം കുറഞ്ഞെങ്കിലും അരൂരിന്റെ അഞ്ചാം എം.എല്‍.എയാവുന്ന ഷാനി മോളുടെ വിജയത്തിന് തിളക്കമേറെ.