ലോർഡ്‌സ്: ഇന്ത്യ-ഇംഗ്ലണ്ട് മൂന്നാം ടെസ്റ്റിൽ തകർപ്പൻ റെക്കോർഡ് സ്വന്തമാക്കി ഇംഗ്ലണ്ട് സൂപ്പർതാരം ജോ റൂട്ട്. ഇത്തവണ ഫീൽഡിങ്ങിലാണ് റൂട്ട് റെക്കോർഡിട്ടത്. ടെസ്റ്റ് ക്രിക്കറ്റിൽ ഏറ്റവും കൂടുതൽ ക്യാച്ചുകൾ നേടുന്ന ഫീൽഡറായി മാറാനാണ് റൂട്ടിന് സാധിച്ചത്. 211 ക്യാച്ചുകളാണ് റൂട്ട് ടെസ്റ്റിൽ നേടിയിട്ടുള്ളത്.

210 ക്യാച്ചുകൾ നേടിയ ഇന്ത്യൻ വന്മതിൽ രാഹുൽ ദ്രാവിഡിനെ മറികടന്നാണ് റൂട്ട് ഈ നേട്ടത്തിലേക്ക് നടന്നുകയറിയത്. 205 ക്യാച്ചുകൾ നേടിയ മുൻ ശ്രീലങ്കൻ താരം മഹേള ജയവർധനെയാണ് പട്ടികയിലെ മൂന്നാമൻ. 200 ക്യാച്ചുകൾ നേടിയ സ്റ്റീവ് സ്മിത്ത്, ജാക് കാലിസ് എന്നിവരാണ് പട്ടികയിലെ മറ്റുള്ള താരങ്ങൾ. 

മത്സരത്തിൽ മലയാളി താരം കരുൺ നായരുടെ ക്യാച്ച് നേടിയാണ് റൂട്ട് ദ്രാവിഡിനെ മറികടന്നത്. 62 പന്തിൽ നാല് ഫോറുകൾ ഉൾപ്പടെ 40 റൺസ് നേടിയാണ് കരുൺ മടങ്ങിയത്. 

ഒന്നാം ഇന്നിങ്സിൽ സെഞ്ച്വറി നേടിയും റൂട്ട് തിളങ്ങിയിരുന്നു.  199 പന്തിൽ 104 റൺസ് നേടിയാണ് റൂട്ട് തിളങ്ങിയായത്. 10 ഫോറുകൾ അടങ്ങുന്നതാണ് താരത്തിന്റെ ഇന്നിംഗ്സ്. തന്റെ ടെസ്റ്റ് കരിയറിലെ മുപ്പത്തി ഏഴാം സെഞ്ച്വറിയാണ് റൂട്ട് ലോർഡ്‌സിൽ നേടിയത്. ലോർഡ്‌സിൽ റൂട്ട് നേടുന്ന എട്ടാം സെഞ്ച്വറി ആണിത്.

റൂട്ടിന് പുറമെ ജാമി സ്മിത്ത്, ബ്രെയ്‌ഡൻ കാർസ് എന്നിവരും അർദ്ധ സെഞ്ച്വറി നേടി തിളങ്ങി. ജാമി സ്മിത്ത് 56 പന്തിൽ 521 റൺസാണ് നേടിയത്. ആറ് ഫോറുകളാണ് താരം നേടിയത്. കാർസ് 83 പന്തിൽ ആറ് ഫോറുകളും ഒരു സിക്‌സും ഉൾപ്പെടെ 56 റൺസും നേടി. 

ഇന്ത്യൻ ബൗളിങ്ങിൽ അഞ്ചു വിക്കറ്റുകൾ നേടി ജസ്പ്രീത് ബുംറ മികച്ച പ്രകടനമാണ് പുറത്തെടുത്തത്. മുഹമ്മദ് സിറാജ്, നിതീഷ് കുമാർ റെഡ്ഢി എന്നിവർ രണ്ട് വിക്കറ്റുകളും രവീന്ദ്ര ജഡേജ ഒരു വിക്കറ്റും സ്വന്തമാക്കി. 

ഇംഗ്ലണ്ട് പ്ലെയിങ് ഇലവൻ

സാക്ക് ക്രാളി, ബെൻ ഡക്കറ്റ്, ഒല്ലി പോപ്പ്, ജോ റൂട്ട്, ഹാരി ബ്രൂക്ക്, ബെൻ സ്റ്റോക്സ്(ക്യാപ്റ്റൻ), ജാമി സ്മിത്ത്(വിക്കറ്റ് കീപ്പർ), ക്രിസ് വോക്സ്, ബ്രൈഡൺ കാർസ്, ജോഫ്ര ആർച്ചർ, ഷോയിബ് ബഷീർ

ഇന്ത്യ പ്ലെയിങ് ഇലവൻ 

യശസ്വി ജയ്സ്വാൾ, കെഎൽ രാഹുൽ, കരുണ് നായർ, ശുഭ്മാൻ ഗിൽ(ക്യാപ്റ്റൻ), ഋഷഭ് പന്ത്(വിക്കറ്റ് കീപ്പർ), നിതീഷ് കുമാർ റെഡ്ഡി, രവീന്ദ്ര ജഡേജ, വാഷിംഗ്ടൺ സുന്ദർ, ആകാശ് ദീപ്, ജസ്പ്രീത് ബുംറ, മുഹമ്മദ് സിറാജ്.

England superstar Joe Root broke a record in the third India-England Test This time Root set a record in fielding Root managed to become the fielder who took the most catches in Test cricket