തിരൂര്‍: പുതിയ കെട്ടിടമൊരുക്കാതെ തിരൂര്‍ സബ് രജിസ്ട്രാര്‍ ഓഫിസ് വാടക കെട്ടിടത്തിലേക്ക് മാറ്റാനുള്ള ആസൂത്രിത നീക്കത്തെ തടയണമെന്ന് ആധാരമെഴുത്തുകാരുടെ സംഘടനയായ ഓള്‍ കേരള ഡോക്യുമെന്റ് റൈറ്റേഴ്‌സ് അസോസിയേഷന്‍.
കാലപ്പഴക്കമുള്ളതും സൗകര്യങ്ങളില്ലാത്തതുമായ സബ് രജിസ്ട്രാര്‍ ഓഫിസുകള്‍ക്ക് പുതിയ കെട്ടിടം പണിയുന്നതിന് കിഫ്ബി മുഖേന ഫണ്ട് അനുവദിച്ചിട്ടുണ്ടെന്നിരിക്കെയാണ് തിരൂര്‍ സബ് രജിസ്ട്രാര്‍ ഓഫിസ് വാടക കെട്ടിടത്തിലേക്ക് മാറ്റാന്‍ നീക്കമെന്ന് ഭാരവാഹികള്‍ പറഞ്ഞു.
നടപടികളിലെ സുതാര്യതയില്ലായ്മ വ്യക്തമാക്കുന്ന വിവരാവകാശ രേഖ ലഭിച്ചിട്ടുണ്ട്. കാലപ്പഴക്കമുള്ള കെട്ടിടം പൊളിച്ചുനീക്കി അവിടെ തന്നെ പുതിയ കെട്ടിടം പണിയാന്‍ സൗകര്യമുണ്ടെന്ന് എഞ്ചിനീയര്‍മാര്‍ അറിയിച്ചിട്ടുണ്ട്. എന്നാല്‍ പൊതുമരാമത്ത് കെട്ടിട വിഭാഗം വിയോജിപ്പ് രേഖപ്പെടുത്തിയിരിക്കുകയാണ്. ഇതിന് പിന്നിലും ഗൂഢലക്ഷ്യങ്ങളുണ്ടെന്ന് ഇവര്‍ പറഞ്ഞു. കെ. അബ്ദുല്‍ അസീസ്, പി ശശിധരന്‍, വി ശിവശങ്കരന്‍ നായര്‍, കെ പ്രേമദാസ്, കെ.ടി സജീഷ് വാര്‍ത്താസമ്മേളനത്തില്‍ പങ്കെടുത്തു.