മലപ്പുറം: സുന്നി യുവജന സംഘം സംസ്ഥാന കമ്മിറ്റി 'കരുണയാണ് തിരുനബി (സ്വ)'എന്ന പ്രമേയത്തില്‍ ആചരിക്കുന്ന റബീഅ് കാംപയിനിന്റെ സംസ്ഥാനതല ഉദ്ഘാടനം നാളെ പാണക്കാട്ട് നടക്കും.
സയ്യിദ് ഹൈദരലി ശിഹാബ് തങ്ങളുടെ വസതിയില്‍ രാവിലെ ഏഴിന് നടക്കുന്ന പ്രവാചക പ്രകീര്‍ത്തന സദസില്‍ മൗലിദ് പാരായണത്തോടെയാണ് ഒരുമാസം നീളുന്ന കാംപയിന്‍ തുടങ്ങുന്നത്.
സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍, സമസ്ത വിദ്യാഭ്യാസ ബോര്‍ഡ് ജന. സെക്രട്ടറി എം.ടി അബ്ദുല്ല മുസ്‌ലിയാര്‍, മലപ്പുറം ജില്ലയില്‍നിന്നുള്ള സമസ്ത കേന്ദ്ര മുശാവറ അംഗങ്ങള്‍, എസ്.വൈ.എസ് സംസ്ഥാന ഭാരവാഹികള്‍, പ്രവര്‍ത്തക സമിതി അംഗങ്ങള്‍, സമസ്ത പോഷക ഘടകങ്ങളുടെ സംസ്ഥാന ഭാരവാഹികള്‍, എസ്.വൈ.എസ് മലപ്പുറം ജില്ലാ കമ്മിറ്റി അംഗങ്ങള്‍, മറ്റു പ്രമുഖര്‍ മൗലിദ് സദസില്‍ പങ്കുചേരും. കാംപയിന്‍ പ്രഖ്യാപനം സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും.
റബീഉല്‍ അവ്വലിനു വിളംബരമോതി ചൊവ്വാഴ്ച വൈകിട്ട് ജില്ലാതലങ്ങളില്‍ മീലാദ് വിളംബരറാലികള്‍ നടക്കും. തുടര്‍ന്ന് മണ്ഡലം കമ്മിറ്റികളുടെ ആഭിമുഖ്യത്തില്‍ മീഠീ മദീന പ്രകീര്‍ത്തനാനുഭൂതി സദസ്, മേഖല- പഞ്ചായത്തുതല റാലികള്‍, ശാഖാതല പ്രമേയ പ്രഭാഷണം, മെഹ്മാനെ മൗലൂദ് പ്രകീര്‍ത്തന കുടുംബ സദസുകള്‍ തുടങ്ങിയവയും നടക്കും. നവംബര്‍ 27ന് ജില്ലാതലങ്ങളില്‍ നടക്കുന്ന സെമിനാറുകളോടെ കാംപയിന്‍ സമാപിക്കും.