അങ്കാറ: സഊദി മാധ്യമപ്രവര്‍ത്തകന്‍ ജമാല്‍ ഖഷോഗിയുടെ മൃതദേഹം രാജ്യത്തിനു പുറത്തേക്കു കടത്തിയതായി സംശയമുണ്ടെന്നു തുര്‍ക്കി പ്രതിരോധ മന്ത്രി ഹുല്‍സി അകര്‍. ഭാഗങ്ങളാക്കി കടത്തിയിരിക്കാനാണ് സാധ്യതയെന്നു കാനഡയില്‍ ഹലിഫാക്‌സില്‍ സംസാരിക്കവേ അദ്ദേഹം പറഞ്ഞു.
കൊലപാതകം നടത്തി മൂന്നോ നാലോ മണിക്കൂറിനുള്ളില്‍ കൊലയാളികള്‍ രാജ്യംവിട്ടു. ഭാഗങ്ങളാക്കിയ മൃതദേഹം ലഗേജുകളുടെ കൂടെയായിരിക്കും കടത്തിയിട്ടുണ്ടാകുക. നയതന്ത്ര പരിഗണന കാരണത്തനാല്‍ കൊലയാളികള്‍ പരിശോധന നേരിട്ടിട്ടുണ്ടാകില്ലെന്നും അദ്ദേഹം പറഞ്ഞു. സഊദിയില്‍നിന്നെത്തിയ ഫോറന്‍സിക് വിദഗ്ധര്‍ ഉള്‍പ്പെടെയുള്ള 15 അംഗ സംഘമാണ് ഖഷോഗിയെ വധിച്ചതെന്നാണ് തുര്‍ക്കി പറയുന്നത്.
കൊലപാതകം നടത്തിയതിനു ശേഷം മൃതദേഹം ഭാഗങ്ങളാക്കിയെന്നും തെളിവുകള്‍ നശിപ്പിക്കാനായി ആസിഡ് ഉപയോഗിച്ച് ഇല്ലാതാക്കിയെന്നുമായിരുന്നു തുര്‍ക്കി പ്രോസിക്യൂഷന്‍ നേരത്തെ പറഞ്ഞിരുന്നത്. എന്നാല്‍, മൃതദേഹം ഭാഗങ്ങളാക്കിയതിനു ശേഷം കോണ്‍സുലേറ്റില്‍നിന്ന് അവശിഷ്ടങ്ങള്‍ പ്രാദേശികര്‍ക്കു നല്‍കിയെന്നാണ് സഊദി പ്രോസിക്യൂട്ടര്‍ ഷലാന്‍ അല്‍ ഷലാന്‍ വ്യാഴാഴ്ച പറഞ്ഞത്.
കൊലപാതകത്തില്‍ പങ്കാളികളായ അഞ്ചു പേര്‍ക്കു വധശിക്ഷ നല്‍കാന്‍ ആവശ്യപ്പെട്ടുവെന്നു സഊദി പ്രോസിക്യൂട്ടര്‍ പറഞ്ഞിരുന്നു. കുറ്റകൃത്യത്തില്‍ പങ്കാളികളായ മറ്റുള്ളവര്‍ക്ക് ഉചിതമായ ശിക്ഷ നല്‍കാനും നിര്‍ദേശിച്ചുവെന്ന് അദ്ദേഹം പറഞ്ഞു.