കയ്പമംഗലം: കള്ളനോട്ടും നോട്ടടി യന്ത്രവും പിടികൂടിയ സംഭവത്തില്‍ ഉന്നതതല അന്വേഷണം വേണമെന്ന് കയ്പമംഗലം എം.എല്‍.എ ഇ.ടി ടൈസണ്‍ മാസ്റ്റര്‍ മുഖ്യമന്ത്രിയോട് ആവശ്യപ്പെട്ടു. ബി.ജെ.പി നേതാക്കളായ എരാശേരി രാജേഷ്, രാജീവ് എന്നിവരുടെ വീട്ടില്‍ നിന്നാണ് കള്ളനോട്ടും നോട്ടടി യന്ത്രവും പിടികൂടിയത്. സംഭവത്തില്‍ ഉന്നത നേതാക്കള്‍ ഉള്‍പ്പെട്ടിട്ടുണ്ടോയെന്ന കാര്യം പുറത്തുകൊണ്ടുവരണമെന്നും ടൈസണ്‍ മാസ്റ്റര്‍ ആവശ്യപ്പെട്ടു.
ബി.ജെ.പിയുടെയും യുവമോര്‍ച്ചയുടെയും നേതാക്കളായ ഇരുവരും വര്‍ഷങ്ങളായി ക്രിമിനല്‍ കുറ്റങ്ങളില്‍ പങ്കാളികളായവരും പ്രദേശത്ത് സാമൂഹിക അസ്ഥിരത സൃഷ്ടിക്കുന്നവരുമാണ്.
കൊടുങ്ങല്ലൂരിലെയും സമീപ പ്രദേശങ്ങളിലേയും സമാധാന അന്തരീക്ഷം തകര്‍ക്കുന്നതില്‍ കള്ളപ്പണത്തിന് പങ്കുണ്ടെന്ന് നേരത്തേതന്നെ ആരോപണം ഉയര്‍ന്നിരുന്നു. ഇത് ശരിയാണെന്നതിലേക്കാണ് ഇപ്പോഴത്തെ സംഭവങ്ങള്‍ വിരല്‍ചൂണ്ടുന്നതെന്നും എം.എല്‍.എ മുഖ്യമന്ത്രിക്ക് നല്‍കിയ പരാതിയില്‍ സൂചിപ്പിക്കുന്നു.