ഗൂഡല്ലൂര്‍: പന്തല്ലൂര്‍ താലൂക്കിലെ ദേവാലയിലും പരിസര പ്രദേശങ്ങളിലും രൂക്ഷമായ കാട്ടാന ശല്യത്തിന് പരിഹാരം കാണാത്തതില്‍ പ്രതിഷേധിച്ച് നാട്ടുകാര്‍ ആഹ്വാനം ചെയ്തിരുന്ന ഉപരോധസമരം മാറ്റിവച്ചു. വനം വകുപ്പ്, പൊലിസ് ഉദ്യോഗസ്ഥരുമായി നടന്ന ചര്‍ച്ചയില്‍ വന്യമൃഗശല്യ പരിഹാരത്തിന് അടിയന്തര നടപടിയുണ്ടാകുമെന്ന് ഉറപ്പ് ലഭിച്ചതോടെയാണ് ഈ മാസം 28ന് നടത്താനിരുന്ന ദേവാല റെയ്ഞ്ച് ഓഫിസ് ഉപരോധ സമരം മാറ്റിവച്ചത്. ദേവാല, കൈതകൊല്ലി, കോട്ടവയല്‍, അമ്പല കൊല്ലി പ്രദേശങ്ങളിലാണ് കോട്ടാന ശല്യം രൂക്ഷമായിരുന്നത്. നിരവധി തവണ അധികൃതര്‍ക്ക് പരാതി നല്‍കിയിരുന്നെങ്കിലും നടപടിയുണ്ടായിരുന്നില്ല. തുടര്‍ന്നാണ് നാട്ടുകാര്‍ ഉപരോധ സമരത്തിന് തീരുമാനിച്ചത്.