ആലപ്പുഴ: തദ്ദേശസ്വയംഭരണ സ്ഥാപനങ്ങളുടെ കീഴിലുള്ള ജനകീയാസൂത്രണം 2018-19 പദ്ധതി പുരോഗതി വകുപ്പ് മന്ത്രി എ.സി മൊയ്തീന്റെ നേതൃത്വത്തില്‍ വിലയിരുത്തി. ആര്യാട് പഞ്ചായത്ത് കമ്മ്യൂണിറ്റി ഹാളില്‍ നടന്ന അവലോകന യോഗം ജില്ലയിലെ 72 ഗ്രാമപഞ്ചായത്തുകളുടെയും 12 ബ്ലോക്ക് പഞ്ചായത്തുകളുടെയും 6 നഗരസഭകളുടെയും ജില്ലാ പഞ്ചായത്തിന്റെയും ഈ വര്‍ഷത്തെ പദ്ധതി പുരോഗതിയാണ് ചര്‍ച്ച ചെയ്തത്.
സ്പില്‍ ഓവറും പുതിയതും ഉള്‍പ്പെടെ പദ്ധതി നിര്‍വഹണം ജില്ലയില്‍ മൊത്തത്തില്‍ 37%ആണ്. ഇതില്‍ ഗ്രാമപഞ്ചായത്തുകളുടെ പദ്ധതി ചെലവ് 35.63 ശതമാനവും ബ്ലോക്ക് പഞ്ചായത്ത് 39.32 ശതമാനവും നഗരസഭകളുടെത് 43.45 ശതമാനവും ആണ്. ജില്ലാപഞ്ചായത്തിന്റേത് 33.68 ശതമാനവും ആണ്. വരുന്ന ജനുവരിയില്‍ പൂര്‍ണമായും പദ്ധതികള്‍ പൂര്‍ത്തീകരിക്കുക എന്ന ലക്ഷ്യത്തോടെ ജാഗ്രതയോടെ പ്രവര്‍ത്തിക്കണമെന്ന് മന്ത്രി നിര്‍ദ്ദേശം നല്‍കി.
പുതിയ പദ്ധതികളുടെ പുരോഗതിയില്‍ 20 ശതമാനത്തില്‍ കുറവ് കാണിച്ച ഗ്രാമപഞ്ചായത്തുകള്‍ കാവാലം, പാണ്ടനാട,് കൈനകരി, തലവടി, മുളക്കുഴ എന്നിവ പദ്ധതി നടത്തിപ്പ് വേഗത്തിലാക്കാന്‍ നിര്‍ദ്ദേശം നല്‍കി. വെളിയനാട്, ചെങ്ങന്നൂര്‍, ചമ്പക്കുളം ബ്ലോക്കുകള്‍ പദ്ധതി നിര്‍വഹണത്തില്‍ ശതമാനത്തില്‍ പിന്നിലാണ്.
മാവേലിക്കര, ചെങ്ങന്നൂര്‍ നഗരസഭകളും പദ്ധതിനിര്‍വഹണത്തില്‍ പിന്നിലാണെന്ന് യോഗം വിലയിരുത്തി. യോഗത്തില്‍ വകുപ്പുമേധാവികള്‍ പലരും എത്തിയില്ല. ഇത്തരം പ്രവണതകള്‍ ആവര്‍ത്തിക്കരുതെന്നും എത്താതിരുന്നവരില്‍നിന്ന് കാരണം ചോദിച്ചു നടപടിയെടുക്കുമെന്നും മന്ത്രി പറഞ്ഞു.
വാട്ടര്‍ അതോറിറ്റിയെക്കുറിച്ചും കെ.എസ്.ഇ.ബിയെ കുറിച്ചും നിരവധി പരാതികള്‍ ഉയര്‍ന്നതിനെതുടര്‍ന്ന് ഒരു യോഗം ജില്ലാ കലക്ടറുടെ അധ്യക്ഷനായി ചേര്‍ന്ന് പദ്ധതി നടത്തിപ്പിനുള്ള വീഴ്ചകളും തടസങ്ങളും നീക്കണമെന്ന് മന്ത്രി നിര്‍ദ്ദേശിച്ചു. യോഗത്തില്‍ ജില്ലാപഞ്ചായത്ത് പ്രസിഡന്റ് ജി. വേണുഗോപാല്‍ അധ്യക്ഷനായി. നഗരകാര്യ ഡയരക്ടര്‍ ആര്‍.ഗിരിജ, ജില്ലാ പ്ലാനിങ് ഓഫിസര്‍ കെ.എസ് ലതി, തദ്ദേശ സ്ഥാപന പ്രതിനിധികള്‍, ജില്ലാ തല വകുപ്പ് മേധാവികള്‍, ഉദ്യോഗസ്ഥര്‍ എന്നിവര്‍ യോഗത്തില്‍ സംബന്ധിച്ചു.