വടകര: പ്രദേശവാസികള്‍ക്ക് ഏറെ പ്രയാസം സൃഷ്ടിക്കുന്ന തരത്തില്‍ പ്രവര്‍ത്തിക്കുന്ന മണല്‍ സ്ഥാപനത്തിനെതിരേ നാട്ടുകാര്‍ രംഗത്ത്. ഒഞ്ചിയം അമ്പലപ്പറമ്പ് വയനോളിത്താഴ റോഡിന്റെ സമീപത്ത് പ്രവര്‍ത്തിക്കുന്ന മണ്ടോടി ട്രേഡേഴ്‌സിനെതിരെയാണ് നാട്ടുകാര്‍ പ്രതിഷേധവുമായി രംഗത്തു വന്നിരിക്കുന്നത്.
പാറപ്പൊടി, മണല്‍, സിമന്റ്, ജില്ലി എന്നിവ ശേഖരിച്ച് വില്‍പന നടത്തുന്ന സ്ഥാപനമാണിത്. ദിവസവും പുലര്‍ച്ചെ നാലു മുതല്‍ രാത്രി ഒരു മണി വരെ സമയവ്യത്യാസമില്ലാതെ വലിയ വാഹനങ്ങളില്‍ കൊണ്ടു വന്ന് ഇറക്കുകയും കയറ്റുകയും ചെയ്യുകയാണ്. ഇവ ഇറക്കുകയും കയറ്റുകയും ചെയ്യുന്ന സമയങ്ങളില്‍ വലിയ തോതില്‍ പൊടിപടലവും പുകയും ശബ്ദവും കാരണം പ്രദേശവാസികള്‍ക്ക് ആസ്തമ പോലുള്ള രോഗങ്ങള്‍ പിടിപെട്ടിരിക്കുകയാണന്ന് നാട്ടുകാര്‍ പറയുന്നു.
മാത്രമല്ല സ്ഥാപനത്തിന്റെ കോംപൗണ്ടില്‍ ജലക്ഷാമമുള്ള പ്രദേശമായിട്ടും വലിയ കിണര്‍ കുഴിച്ച് വാഹനങ്ങള്‍ വൃത്തിയാക്കുകയും ജലമലിനീകരണമുണ്ടാക്കുകയും ചെയ്യുകയാണ്. കഴിഞ്ഞ വേനലില്‍ വെള്ളം വാഹനങ്ങളില്‍ കൊണ്ടുപോയി വില്‍പന നടത്തിയത് മൂലം മറ്റു കിണറുകള്‍ വറ്റിയതായും നാട്ടുകാര്‍ പരാതിപ്പെട്ടു. പ്രശ്‌ന പരിഹാരത്തിനായി പ്രദേശവാസികള്‍ ഉടമയുമായി സംസാരിച്ചിട്ടും അദ്ദേഹം നിസംഗത കാണിക്കുകയാണെന്നും നാട്ടുകാര്‍ കുറ്റപ്പെടുത്തി.
അതേസമയം വിവരാവകാശ നിയമപ്രകാരം പഞ്ചായത്തില്‍നിന്നു ലഭിച്ച വിവരത്തിന്റെ അടിസ്ഥാനത്തില്‍ ഈ സ്ഥാപനത്തിന് സിമന്റ് സ്റ്റോക്ക് ചെയ്ത് വില്‍പന നടത്താനുള്ള ലൈസന്‍സ് മാത്രമാണുള്ളതെന്ന് അറിയാന്‍ കഴിഞ്ഞു. ഇത്രയും രൂക്ഷമായ പാരിസ്ഥിതിക പ്രശ്‌നങ്ങളുള്ള ഈ സ്ഥാപനം പ്രവര്‍ത്തിക്കാന്‍ അനുമതി നല്‍കുമ്പോള്‍ പരിസരവാസികളുടെ സമ്മതപത്രമില്ലാതെ എങ്ങനെ പ്രവര്‍ത്തിക്കുന്നു എന്നത് അത്ഭുതമാണെന്നും നാട്ടുകാര്‍ പറഞ്ഞു.
സ്ഥാപനത്തിനെതിരേ നടപടിയെടുത്ത് പരിഹാരം കാണണമെന്നാണ് നാട്ടുകാര്‍ ആവശ്യപ്പെടുന്നത്. ഇതു സംബന്ധിച്ച് സംസ്ഥാന ആരോഗ്യ വിഭാഗം, ജില്ലാ കലക്ടര്‍, വടകര ആര്‍.ഡി.ഒ, വടകര തഹസില്‍ദാര്‍, പഞ്ചായത്ത് സെക്രട്ടറി എന്നിവര്‍ക്ക് നാട്ടുകാര്‍ പരാതി നല്‍കി.