ഉരുവച്ചാല്‍: ഉരുവച്ചാലില്‍ അനധികൃതപാര്‍ക്കിങ് അപകടങ്ങള്‍ സൃഷ്ടിക്കുന്നു. അപകടത്തില്‍ ബൈക്ക് യാത്രക്കാരന്റെ കാല്‍മുട്ടിന് ഗുരുതരമായി പരുക്കേറ്റു. ഇന്നലെ രാവിലെ ഉരുവച്ചാല്‍ ശിവപുരം റോഡിലാണ് അപകടം. ബൈക്കില്‍ കൊട്ടിയൂര്‍ ഉത്സവത്തിന് പോയി വരികയായിരുന്ന കണ്ണൂര്‍ സ്വദേശിയായ വെങ്കിടേശ്വരന്‍(40) ആണ് ഓട്ടോ ഇടിച്ച് കാല്‍മുട്ടിന് ഗുരുതരമായി പരുക്കേറ്റത്. കണ്ണൂരിലെ സ്വകാര്യ ആശുപത്രിയില്‍ പ്രാഥമികചികിത്സ നല്‍കിയ ശേഷം ഇയാളെ കോയമ്പത്തൂരിലേക്ക് കൊണ്ടു പോയി. ശിവപുരം ഭാഗത്തു നിന്നു വരികയായിരുന്ന ബൈക്കില്‍ ഓട്ടോ ഇടിച്ചാണ് അപകടം. റോഡിന്റ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്തതിനെ തുടര്‍ന്ന് വാഹനങ്ങളുടെ മറയില്‍ എതിരെ നിന്നു വരുന്ന വാഹനത്തെ കാണാന്‍ കഴിയാത്തതാണ് അപകടത്തിനിടയാവുന്നത്. കഴിഞ്ഞ ദിവസം ഇതേ സ്ഥലത്തു വച്ച് ഉരുവച്ചാല്‍ ട്രേഡിങ് കമ്പനിയിലെ തൊഴിലാളി യൂനുസിനു കാലിന് മുകളിലൂടെ കാര്‍ കയറി പരുക്കേറ്റിരുന്നു. വാഹനങ്ങള്‍ റോഡരികില്‍ നിര്‍ത്തിയിടുന്നത് വഴി യാത്രക്കാര്‍ക്ക് നടന്നു പോകുന്നതിനും തടസമാവുകയാണ്. വാഹനങ്ങള്‍ നിയന്ത്രിക്കുന്നതിനായി ഉരുവച്ചാലില്‍ നിയമിച്ചിരുന്ന ഹോംഗാര്‍ഡ് ഇപ്പോള്‍ ഡ്യൂട്ടിക്ക് എത്താറില്ല.