കുണിയ(കാസര്‍കോട്): വിദ്യാര്‍ഥികളുമായി പോവുകയായിരുന്ന ഓട്ടോയില്‍ ലോറിയിടിച്ചതിനെ തുടര്‍ന്നുണ്ടായ അപകടത്തില്‍ ഓട്ടോ ഡ്രൈവര്‍ മരിച്ചു. തിരുവന്തപുരം സ്വദേശിയും പെരിയാട്ടടുക്കത്ത് താമസിക്കുകയും ചെയ്യുന്ന നിസാര്‍, നൂര്‍ജഹാന്‍ എന്നിവരുടെ മകന്‍ അന്‍സാരി (35) ആണ് മരിച്ചത്.

അപകടത്തില്‍ കുണിയ ഗവ. വൊക്കേഷണല്‍ ഹയര്‍ സെക്കന്ററി സ്‌കൂള്‍ യു.കെ.ജി വിദ്യാര്‍ഥികളായ അനാമിക (നാല്), ഫാതിമത്ത് സൈദ (നാല്), ഒന്നാം ക്ലാസ് വിദ്യാര്‍ഥി നിഹാല്‍ (06) ഫെബിന മുഹമ്മദ് (നാല്), റുഖ്‌യത്ത് സലീന (നാല്), നാലാം ക്ലാസ് വിദ്യാര്‍ഥികളായ ഹബീബ് റഹ്മാന്‍ (09), നൂര്‍ ഫാത്തിമ (09), അംഗന്‍വാടി വിദ്യാര്‍ഥികളായ റബീഅ (03), ഖദീജ (03) എന്നീ വിദ്യാര്‍ഥികള്‍ക്കാണ് അപകടത്തില്‍ പരുക്കേറ്റത്. നിസാര പരുക്കേറ്റ അഞ്ചു വിദ്യാര്‍ഥികള്‍ക്കു പെരിയ ഗവ. ആശുപത്രിയില്‍ നിന്നും പ്രാഥമിക ശുശ്രൂഷ നല്‍കി വിട്ടയച്ചു. മറ്റുള്ളവര്‍ കാസര്‍ക്കോട്ടെ ആശുപത്രിയില്‍ ചികിത്സയിലാണ്. വിദ്യാര്‍ഥികളുടെ പരുക്ക് സാരമുള്ളതല്ല.

രാവിലെ 10.00 ഓടെയാണ് അപകടം. വിദ്യാര്‍ഥികളുമായി സ്‌കൂളിലേക്ക് പോവുകയായിരുന്ന ഓട്ടോയെ പിന്നില്‍ നിന്നുംലോറി ഇടിക്കുകയായിരുന്നു. ഇടിയുടെ ആഘാതത്തില്‍ നിയന്ത്രണം നഷ്ടപ്പെട്ട ഓട്ടോ ഒരു കാറിനു മുകളില്‍ വീഴുകയും ചെയ്തു. കണ്ണൂര്‍ ഭാഗത്ത് നിന്നും മംഗളൂരു ഭാഗത്തേക്ക് ജെ.സി.ബി കയറ്റി പോവുകയായിരുന്ന ലോറിയാണ് അപകടം വരുത്തിയത്. സംഭവത്തില്‍ ഗുരുതരമായി പരുക്കേറ്റ അന്‍സാരിയെ ഉടന്‍ തന്നെ കാസര്‍ക്കോട്ടെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ബേക്കല്‍ പൊലിസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹം കാസര്‍ക്കോട് ജനറല്‍ ആശുപത്രിയില്‍ പോസ്റ്റുമോര്‍ട്ടം നടത്തി. ലോറിയും ഇതിന്റെ ഡ്രൈവര്‍ മഹാരാഷ്ട്ര സ്വദേശി സുനില്‍ രാംദാസിനെയും ബേക്കല്‍ പൊലിസ് കസ്റ്റഡിയില്‍ എടുത്തു.