ന്യൂഡല്‍ഹി: നരേന്ദ്രമോദി സര്‍ക്കാര്‍ എത്ര അംഗീകരിക്കാതിരുന്നാലും ശരി ഉയര്‍ന്ന മൂല്യമുള്ള നോട്ടുകള്‍ അസാധുവാക്കിയ തീരുമാനം ചരിത്രപരമായ പരാജയം തന്നെയായിരുന്നുവെന്ന് മുന്‍ പ്രധാനമന്ത്രി ഡോ. മന്‍മഹോന്‍ സിങ്. എന്തെല്ലാം ലക്ഷ്യങ്ങള്‍ അവകാശപ്പെട്ടാണോ നോട്ടുകള്‍ നിരോധിച്ചത്, അവകൈവരിക്കുന്നതില്‍ ഈ നടപടി പൂര്‍ണമായും പരാജയപ്പെട്ടു. നോട്ട് നിരോധനത്തിന്റെ പ്രത്യാഘാതങ്ങള്‍ നമ്മള്‍ അനുഭവിച്ചുവരികയാണെന്നും അദ്ദേഹം പറഞ്ഞു. മധ്യപ്രദേശിലെ ഇന്‍ഡോറില്‍ കോണ്‍ഗ്രസ്സിന്റെ തെരഞ്ഞെടുപ്പ് പ്രചാരണപരിപാടിയില്‍ സംസാരിക്കുകയായിരുന്നു മന്‍മോഹന്‍ സിങ്. നോട്ട്‌നിരോധനത്തിലും ജി.എസ്.ടിയിലും റാഫേല്‍ ഇടപാടിലും കേന്ദ്രസര്‍ക്കാരിന്റെ പിഴവുകള്‍ ചൂണ്ടിക്കാട്ടിയ അദ്ദേഹം, ജനങ്ങളെല്ലാം ബി.ജെ.പിയെ പരാജയപ്പെടുത്തണമെന്ന് ആഹ്വാനംചെയ്തു.