ആലപ്പുഴ: നഗരത്തില്‍ മാനദണ്ഡങ്ങള്‍ പാലിക്കാതെ സ്ഥാപിച്ചിട്ടുള്ള ട്രാഫിക് നിയന്ത്രണ, സൂചന, സ്ഥലനാമ ബോര്‍ഡുകള്‍ യാത്രക്കാര്‍ക്ക് ദുരിതമാകുന്നു. മിക്കവയും അനുചിത സ്ഥാനങ്ങളിലും വിചിത്രമായ രീതികളിലുമാണ് സ്ഥാപിച്ചിട്ടുള്ളത്. കൂടാതെ പലതും സ്വകാര്യ സ്ഥാപനങ്ങള്‍ സ്‌പോണ്‍സര്‍ ചെയ്യുന്നവ ആയതിനാല്‍ സൂചനയേക്കാള്‍ വലിയ പരസ്യമാണ് അവയില്‍ പതിപ്പിച്ചിട്ടുളളത്.
പൊലിസ് സ്ഥാപിച്ചിട്ടുള്ള ബോര്‍ഡുകളും യഥാസ്ഥാനങ്ങളിലല്ല. മരത്തില്‍ ആണിയടിച്ചോ എവിടെയങ്കിലും കെട്ടിവച്ചും ഉത്തരവാദിത്വം ഒഴിവാക്കുകയാണ് പതിവ്. മുന്‍കൂട്ടി വിവരം അറിയിക്കത്തക്ക വിധം സൂചന ലഭ്യമാകത്തക്ക രീതിയില്‍ മുന്നോട്ടു നീക്കി റോഡിന്റെ ഇടതുവശത്തു സ്ഥാപിക്കേണ്ടവ തോന്നിയതു പോലെ എവിടെയെങ്കിലും സ്ഥാപിച്ചിരിക്കുകയാണ്.
റോഡിലും നടപ്പാതയിലും പാലത്തിലും വിലങ്ങനെ കെട്ടിവയ്ക്കുന്ന ബോര്‍ഡുകളുടെ മൂലകളും കൊടിക്കാലുകളുടെ അറ്റവും കാല്‍നടക്കാരുടെ മുഖത്തും കണ്ണിലും കൊണ്ട് ദിവസേന അപകടങ്ങള്‍ വരുത്തുന്നുണ്ട്.
നിരവിധി പേര്‍ക്ക് ഇങ്ങനെ സംഭവിക്കുന്നുണ്ടെങ്കിലും ആരും പരാതിപ്പെടാറില്ല.  റോഡിലേക്കിറങ്ങി നില്‍ക്കുന്ന ബോര്‍ഡുകള്‍ എല്ലാം വാഹനങ്ങള്‍ മുട്ടി വളഞ്ഞിരിക്കുകയാണ്. കാല്‍നടക്കാര്‍ക്കു റോഡിനു നടുവിലൂടെ നടക്കേണ്ട അവസ്ഥയാണ്. അനധികൃത കൈയേറ്റം ഒഴിയണമെന്നാവശ്യപ്പെട്ടു പൊതുമരാമത്ത്, ജില്ലാ ഭരണകൂടം, മുനിസിപ്പാലിറ്റി തുടങ്ങിയവര്‍ കഴിഞ്ഞ പല വര്‍ഷങ്ങളായി പത്രവാര്‍ത്തകള്‍ ആവര്‍ത്തിച്ചു നല്‍കാറുണ്ടെങ്കിലും അവ ഫലപ്രദമായി നടപ്പിലാക്കാന്‍ അധികൃതര്‍ക്ക് ഇനിയും കഴിഞ്ഞിട്ടില്ല.
റോഡു കൈയേറിയുള്ള കച്ചവടത്തിനു അനുമതിയില്ലെന്നും അവ പൊളിച്ചു നീക്കാന്‍ നിര്‍ദേശിച്ചുണ്ടെന്നും പൊതുമരാമത്തു വകുപ്പു മന്ത്രി ജി. സുധാകരന്‍ പലതവണ ആവര്‍ത്തിച്ചെങ്കിലും നടപടിയായില്ല.
നിയമവിരുദ്ധമായി റോഡു കൈയടക്കി പൊതുജനങ്ങളെ അപകടത്തിലേക്കു തള്ളിവിട്ട ശേഷം അതു ഉപജീവനമാര്‍ഗമാണെന്നു അവകാശപ്പെടുന്നത് തികഞ്ഞ ഗൂണ്ടായിസം തന്നെയാണ്. നിയമം പാലിച്ചും ലൈസസുകള്‍ നേടിയും നികുതി അടച്ചും കടകളുടെ ഷട്ടറിനുള്ളില്‍ കച്ചവടം നടത്തുന്ന വ്യാപാരികളെ ഇളിഭ്യരാക്കുകയാണ് ന്യൂനപക്ഷം വരുന്ന കൈയേറ്റ വഴിവാണിഭക്കാര്‍.