ദുബൈ: അടുത്ത വര്‍ഷം നടക്കുന്ന ടി20 ലോകകപ്പിനു നമീബിയ യോഗ്യത നേടി. ദുബൈയില്‍ നടന്ന യോഗ്യതാ മത്സരത്തില്‍ ഒമാനെ പരാജയപ്പെടുത്തിയാണ് നമീബിയ ചരിത്ര നേട്ടം സ്വന്തമാക്കിയത്.
ഇത്തവണ യോഗ്യതാ കടമ്പ കടന്ന് ടി20 ലോകകപ്പിനു യോഗ്യത നേടിയ നാലാമത്തെ ടീമാണ് നമീബിയ. പപ്പുവ ന്യൂഗ്വിനി, അയര്‍ലാന്‍ഡ്, നെതര്‍ലാന്‍ഡ്‌സ് എന്നിവര്‍ നേരത്തേ ലോകകപ്പിന് യോഗ്യത നേടിയിരുന്നു. 2003ല്‍ നടന്ന ഏകദിന ലോകകപ്പില്‍ നമീബിയ കളിച്ചിരുന്നു. എന്നാല്‍ ടി20 ലോകകപ്പില്‍ ആദ്യമായാണ് നമീബിയ കളിക്കുന്നത്.
ഒമാനെതിരായ മല്‍സരത്തില്‍ ആദ്യം ബാറ്റ് ചെയ്ത നമീബിയ 20 ഓവറില്‍ ഏഴിന് 161 റണ്‍സെന്ന മികച്ച സ്‌കോര്‍ നേടിയിരുന്നു. 25 പന്തില്‍ നിന്നും 59 റണ്‍സ് അടിച്ചെടുത്ത ജെജെ സമിത്താണ് നമീബിയയെ ശക്തമായ നിലയിലെത്തിച്ചത്. 20 പന്തുകളിലായിരുന്നു താരം അര്‍ധ സെഞ്ചുറി തികച്ചത്. യോഗ്യതാ ടൂര്‍ണമെന്റിലെ വേഗമേറിയ രണ്ടാമത്തെ ഫിഫ്റ്റി കൂടിയാണിത്.
മറുപടി ബാറ്റിങില്‍ ഒരു ഘട്ടത്തില്‍ ഒന്നിന് 57 റണ്‍സെന്ന മികച്ച നിലയിലായിരുന്ന ഒമാന്‍ വിജയപ്രതീക്ഷയിലായിരുന്നു. എന്നാല്‍ സ്പിന്നര്‍മാരുടെ വരവോടെ ഒമാന്‍ തകകരുകയായിരുന്നു. 104 റണ്‍സിന് ഒമാനെ പിടിച്ചുകെട്ടിയ നമീബിയ 54 റണ്‍സിന്റെ തകര്‍പ്പന്‍ ജയവുമായി ടി20 ലോകകപ്പ് ബെര്‍ത്ത് ഉറപ്പിക്കുകയായിരുന്നു.