ന്യൂഡല്‍ഹി: പ്രധാനമന്ത്രി നരേന്ദ്ര മോദി രാജ്യത്തെ ജനങ്ങള്‍ക്ക് ഈദുള്‍ ഫിത്വര്‍ ആശംസകള്‍ നേര്‍ന്നു. കാരുണ്യത്തിന്റെയും സഹനത്തിന്റെയും ദാനധര്‍മത്തിന്റെയും മഹത്തായ സന്ദേശമാണ് പുണ്യ റംസാന്‍ പങ്കുവയ്ക്കുന്നതെന്നും ഇത് എല്ലാവര്‍ക്കും പ്രചോദനമാണെന്നും അദ്ദേഹം പ്രതിമാസ റേഡിയോ പരിപാടിയായ മന്‍കി ബാത്തില്‍ പറഞ്ഞു.
റംസാന്‍ മാസത്തില്‍ ശൗചാലയങ്ങള്‍ നിര്‍മിക്കാന്‍ മുന്‍കൈയെടുത്ത ഉത്തര്‍പ്രദേശിലെ ബിജിനോര്‍ ജില്ലയിലെ മുബാറക്പൂര്‍ ഗ്രാമവാസികളെ പ്രധാനമന്ത്രി പ്രത്യേകം അഭിനന്ദിച്ചു. പദ്ധതിക്കായി സര്‍ക്കാര്‍ 17 ലക്ഷം രൂപ അനുവദിച്ചിരുന്നു.
എന്നാല്‍ അനുവദിച്ച ഫണ്ട് അവര്‍ തിരിച്ചു നല്‍കുകയും റംസാന്റെ ഭാഗമായി സ്വന്തമായി പണം കണ്ടെത്തി ശൗചാലയങ്ങള്‍ നിര്‍മിക്കുകയും ചെയ്യുകയായിരുന്നു. ഇത് ജനങ്ങള്‍ക്ക് വലിയൊരു മാതൃകയാണെന്ന് പ്രധാനമന്ത്രി പറഞ്ഞു.
കാര്‍ട്ടോസാറ്റ്-2 ഉപഗ്രഹം വിജയകരമായി വിക്ഷേപിച്ച ഐ.എസ.്ആര്‍.ഒയിലെ ശാസ്ത്രജ്ഞരെയും അദ്ദേഹം അഭിനന്ദിച്ചു. 1975ലെ അടിയന്തരാവസ്ഥ ഇന്ത്യന്‍ ജനാധിപത്യത്തിലെ കറുത്ത രാത്രിയാണ്.
ഇന്നത്തെ മാധ്യമ വിദ്യാര്‍ഥികളും ചരിത്ര വിദ്യാര്‍ഥികളും അന്നത്തെ കറുത്ത ദിനങ്ങളെ കുറിച്ച് ഓര്‍ത്തുവയ്ക്കണമെന്നും അദ്ദേഹം പറഞ്ഞു.