ചേവായൂര്‍: കോഴിക്കോട് മെഡിക്കല്‍ കോളജിലെ നെഫ്രോളജി വിഭാഗത്തിന് എം.കെ രാഘവന്‍ എം.പിയുടെ ശ്രമഫലമായി ലഭിച്ച ഡയാലിസിസ് പ്രൊജക്ടിന്റെ ഉദ്ഘാടനം 26ന് മുന്‍ കേന്ദ്രമന്ത്രി എ.കെ ആന്റണി എം.പി നിര്‍വഹിക്കും. 22ഡയാലിസിസ് യന്ത്രങ്ങളാണ് എം.കെ രാഘവന്‍ എം.പി മെഡിക്കല്‍ കോളജ് ആശുപത്രിക്കായി നല്‍കിയത്. തന്റെ ഫണ്ടിലേക്ക് എ.കെ ആന്റണിയുടെയും വയലാര്‍ രവിയുടെയും ഫണ്ടുകള്‍ സംയോജിപ്പിച്ച് 1.71കോടിയാണു പദ്ധതിക്കായി ചെലവിട്ടിരിക്കുന്നത്.
യന്ത്രങ്ങള്‍ നല്‍കിയതിനോടൊപ്പംതന്നെ ഇതു പ്രവര്‍ത്തിപ്പിക്കാനാവശ്യമായ സൗകര്യങ്ങളൊരുക്കാനും ഫണ്ടില്‍നിന്ന് തുക കണ്ടെത്തി. ഇതാദ്യമായാണ് ഇത്രയേറെ ചികിത്സാ യന്ത്രങ്ങള്‍ ഒറ്റത്തവണയായി ഒരു ചികിത്സാ വിഭാഗത്തിന് മാത്രമായി ലഭിക്കുന്നത്. മെഡിക്കല്‍ കോളജ് ആശുപത്രിയിലെ ഡയാലിസിസ് സൗകര്യം ഇരട്ടിയായി വര്‍ധിപ്പിക്കുകയാണു ലക്ഷ്യമെന്ന് എം.കെ രാഘവന്‍ എം.പി പറഞ്ഞു. മെഡിക്കല്‍ കോളജിന്റെ 60 വര്‍ഷത്തെ പ്രവര്‍ത്തനത്തിനിടെ നെഫ്രോളജി വിഭാഗത്തിന് ആകെ ലഭിച്ച ഡയാലിസിസ് മെഷിനുകളുടെ എണ്ണം 26 ആണ്. സ്ഥിരമായി ഡയാലിസിസ് ചെയ്യേണ്ട നിരവധി രോഗികള്‍ ഉണ്ടെങ്കിലും നാലില്‍ കൂടുതല്‍ തവണ ഡയാലിസിസ് ചെയ്യാനുള്ള സംവിധാനം ഇപ്പോള്‍ മെഡിക്കല്‍ കോളജിലില്ല. ഒരു ഡയാലിസിസിനു സ്വകാര്യ സ്ഥാപനങ്ങള്‍ 2,500 മുതല്‍ 3,000 രൂപയാണ് ഈടാക്കുന്നത്. ആഴ്ചയില്‍ മൂന്നും നാലും തവണ രക്ത ശുചീകരണം നടത്തേണ്ട രോഗി സാമ്പത്തികമായി തകര്‍ന്നുപോകുന്ന അവസ്ഥയാണ് ഇന്നുള്ളത്.
മെഡിക്കല്‍ കോളജ് ആശുപത്രിയില്‍ ചികിത്സ തേടിയെത്തുന്ന രോഗികള്‍ക്ക് യന്ത്രങ്ങളുടെ കുറവുമൂലം ആവശ്യത്തിനുള്ള ഡയാലിസിസ് ചെയ്യാന്‍ കഴിയാറില്ലെന്ന് ഡോക്ടര്‍മാര്‍ തന്നെ സാക്ഷ്യപ്പെടുത്തുന്നു.