തിരുവനന്തപുരം: ഡി.ജി.പി ലോക് നാഥ് ബെഹ്‌റയെ വീണ്ടും സംസ്ഥാന പൊലിസ് മേധാവിയായി നിയമിക്കാന്‍ തീരുമാനം. മന്ത്രി സഭാ യോഗത്തിന്റെതാണ് തീരുമാനം. ജൂണ്‍ 30 ന് ടി.പി.സെന്‍കുമാര്‍ വിരമിക്കുന്ന ഒഴിവിലേക്കാണ് ബെഹ്‌റയെ നിയമിക്കുക.നിലവില്‍ വിജിലന്‍സ് മേധാവിയാണ് ബെഹ്‌റ. ബെഹ്റയെ നിയമിക്കാൻ ചീഫ് സെക്രട്ടറി നളിനി നെറ്റോ അധ്യക്ഷയായ സമിതി ശുപാർശ ചെയ്തതായി നേരത്തെ വിവരം ലഭിച്ചിരുന്നു. 1985 ബാച്ച് ഐപിഎസ് ഉദ്യോഗസ്ഥനാണ് ലോക്നാഥ് ബെഹ്റ.

പിണറായി വിജയന്‍ സര്‍ക്കാര്‍ അധികാരമേറ്റതിന് പിന്നാലെ, ഡിജിപിയായിരുന്ന ടിപി സെന്‍കുമാറിനെ മാറ്റി ലോക്നാഥ് ബെഹ്റയെ പൊലീസ് മേധാവിയായി നിയമിച്ചിരുന്നു. പിന്നീട് സുപ്രിംകോടതി വിധിയെത്തുടര്‍ന്ന് സെന്‍കുമാര്‍ പൊലിസ് മേധാവി ആയതോടെ ബെഹ്റയെ വിജിലന്‍സ് ഡയറക്ടറാക്കി.

അതേസമയം, തന്നെ വീണ്ടും പൊലിസ് മേധാവിയായി നിയമിച്ചതില്‍ സര്‍ക്കാരിനോട് നന്ദിയുണ്ടെന്ന് ലോക്‌നാഥ് ബെഹ്‌റ. നിയമന കാര്യം ഔദ്യോഗികമായി അറിയിച്ചിട്ടില്ലെന്നും അദ്ദേഹം മാധ്യമങ്ങളോട് പറഞ്ഞു. മുന്‍പ് ഡി.ജി.പി ആയിരുന്നപ്പോള്‍ പകുതിയില്‍ നിര്‍ത്തിയ കാര്യങ്ങള്‍ പൂര്‍ത്തിയാക്കുമെന്നും ബെഹ്‌റ പറഞ്ഞു.