റോം: പ്രീമിയര്‍ ലീഗിലെ മത്സരത്തിനിടെ വീഴ്ചയില്‍ ഗുരുതരമായി പരുക്കേറ്റ് ലോകത്തെ കരയിപ്പിച്ച എവര്‍ട്ടന്‍ താരം ആന്ദ്രേ ഗോമസിന് ഒടുവില്‍ പോര്‍ച്ചുഗല്‍ ദേശീയ ടീമിലെ സഹതാരവും ലോക ഇതിഹാസവുമായ ക്രിസ്റ്റ്യാനോ റൊണാള്‍ഡോയുടെ ആശ്വാസ വാക്കുകള്‍. ' തീര്‍ച്ചയായും ശക്തമായി തിരിച്ചു വരും' എന്നാണ് റോണോ തന്റെ സന്ദേശത്തില്‍ കുറിച്ചത്.
ഞായറാഴ്ച രാത്രിയാണ് ലോകത്തിന്റെ മനസ് കീഴ്‌പ്പെടുത്തിയ ആ വീഴ്ച ഓരോ ആരാധകരുടേയും വിതുമ്പലില്‍ കലാശിച്ചത്.
പ്രീമിയര്‍ ലീഗില്‍ ടോട്ടനവുമായുള്ള മത്സരത്തിനിടെയായിരുന്നു ടോട്ടനത്തിന്റെ ഹ്യൂങ് മിന്‍ സണ്ണിന്റെ ടാക്കിളിലൂടെ ഗോമസിന് പരുക്കേറ്റത്.
താരത്തിന്റെ കാല്‍ ഒടിഞ്ഞു തൂങ്ങിയ നിലയിലായിരുന്നു. വേദന കൊണ്ട് പുളഞ്ഞതോടെ ചുറ്റുമുള്ള താരങ്ങളുടെ കണ്ണും മുഖവുമെല്ലാം ദുഃഖത്തിലാഴ്ന്നു. സ്റ്റേഡിയത്തുള്ളവരുടെ മുഖവും കണ്ണീര്‍ തുള്ളികളാല്‍ ന നഞ്ഞു. പൊട്ടല്‍ സംഭവിച്ചതോടെ ഉടന്‍ തന്നെ പരിശോധിച്ച മെഡിക്കല്‍ സംഘം പരുക്ക് ഗുരുതരമാണെന്നു സ്ഥിരീകരിച്ചിരുന്നു. ഇതോടെ താരത്തിന് സീസണ്‍ നഷ്ടമാവും.