കുന്ദമംഗലം: കൊലക്കേസില്‍ ജയില്‍ ശിക്ഷ അനുഭവിക്കുന്നതിനിടെ പരോളിലിറങ്ങി മുങ്ങിയ പ്രതിയെ 10 വര്‍ഷത്തിനുശേഷം പൊലിസ് പിടികൂടി.
സുഹൃത്തായ ശിവദാസനെ കൊലപ്പെടുത്തിയ കേസില്‍ പ്രതിയായ ചൂലൂര്‍ സ്വദേശി മണ്ടാരി മനോജിനെയാണ് (40) കുന്ദമംഗലം പൊലിസ് കണ്ണൂരില്‍നിന്ന് പിടികൂടിയത്. 2002ലായിരുന്നു കേസിനാസ്പദമായ സംഭവം. ചാത്തമംഗലത്തെ ശിവദാസനും മനോജും സുഹൃത്തുക്കളായിരുന്നു.
ശിവദാസന്റെ ഭാര്യയുമായി മനോജിനുണ്ടായിരുന്ന അവിഹിത ബന്ധമാണ് കൊലയ്ക്ക് കാരണമായത്. തെങ്ങുകയറ്റ തൊഴിലാളിയായിരുന്ന മനോജ് ശിവദാസനെ രാത്രി വീട്ടില്‍നിന്ന് വിളിച്ചിറക്കി കൊണ്ടുപോയി കൊലപ്പെടുത്തുകയായിരുന്നു. കൊടുവാളുകൊണ്ട് തേങ്ങ അറുക്കുന്നതു പോലെയായിരുന്നു ശിവദാസന്റെ കഴുത്ത് അറുത്തത്.
കേസില്‍ ജീവപര്യന്തം തടവിനു ശിക്ഷിക്കപ്പെട്ട ഇയാള്‍ കണ്ണൂര്‍ സെന്‍ട്രല്‍ ജയിലിലായിരുന്നു. 2008ല്‍ ജാമ്യത്തില്‍ ഇറങ്ങിയശേഷം മുങ്ങുകയായിരുന്നു.